پۆلیسی دامودەزگا نەوتییەکان: کارمەندەکانمان لەلایەن حەشدی شەعبیەوە چەکنەکراون

ئاڤا نیوز

 

بەڕێوەبەرایەتیی پۆلیسی پاراستنی دامودەزگا نەوتییەکان هەواڵێکی کەناڵێکی میدیایی ڕەتدەکاتەوە لەبارەی ئەوەی کە گوایە لەلایەن حەشدی شەعبیەوە کارمەندەکانی دەزگا نەوتییەکان چەککرابن.

 

وێنە گەورەکە: سەر لەبەیانی ئەمڕۆ هێزێکی حەشدی شەعبی لە سنووری ناحیەی کوڵەجۆ لە ئیدارەی سەربەخۆی گەرمیان چوونە ناو کێڵگە نەوتییەکانەوە و بەشێک لە میدیاکانیش دەنگۆی گەمارۆدان و چەککردنی بەشێک لە پۆلیسی پاراستنی دامودەزگا نەوتییەکان بڵاوکردەوە.

 

ڕاگەیێنراوی فەرمی: بەڕێوەبەرایەتیی پۆلیسی پاراستنی دامودەزگا نەوتییەکان دەنگۆی ئەو کەناڵە میدیاییە ڕەتدەکاتەوە و دەڵێت بەبێ بوونی هیچ زانیارییەک هەواڵی چەککردن و لێدانی کارمەندێکمانی بڵاو کردەوە، لەکاتێکدا کارمەندەکانمان لە ئامادەباشیدا بوون بۆ ڕاگرتنی هێزەکەی حشدی شەعبی و جێگیربوونیان تاوەکو هێزی پاڵپشتیی پێشمەرگە گەیشتە ناوچەکە.

 

گۆشەیەکی دیکە دیمەنەکە: بەڕێوەبەرایەتییەکە داوا لە دەزگاکانی ڕاگەیاندن دەکات لە کاتی ئەم جۆرە ڕووداوانە پابەندی ئیتیکی ڕۆژنامەوانی بن و ڕاستی و دروستی ڕووداوەکان وەک خۆی بە ئەمانەتەوە بگوازنەوە.

 

ئەوەی پێویستە بیزانیت: لە سنووری ناحیەی کوڵەجۆ خاڵێکی هێزەکانی پاراستنی دامودەزگا نەوتییەکان هەیە کە ئەرکی پاراستنی کێڵگە و بیرەنەوتییەکانی ئەو دەڤەرەیان لە ئەستۆ دایە.