ئوردن داوا دەکات لە دوو بواردا پەیوەندییەکانی لەگەڵ هەرێمی کوردستان فراوان بکات

ئاڤا نیوز

 

لەمیانی کۆبوونەوە لەگەڵ سەرۆک بارزانی، وەزیرێکی ئوردن داوا دەکات لەڕووی کشتوکاڵ و ئاوەدانکردنەوە پەیوەندییەکانیان لەگەڵ هەرێمی  کوردستان فراوان بکەن،  سەرۆک بارزانیش جەخت لە بەردەوامی و بەهێزتركردنی پەیوەندییەکان دەکاتەوە.

 

چیرۆکی سەرەکی:  سەرۆك بارزانی لە پیرمام لەگەڵ  خالید حنیفات، وەزیری كشتوكاڵی شانشینی ئوردن و شاندێكی یاوەری کۆبووەوە، پەیوەندییەکانی نیوان  هەردوو وڵات، بارودۆخی سیاسی و ئاڵنگارییەكانی بەردەم سەقامگیریی ناوچەكە و عێراق تاوتوێکران.

ڕاگەیێنراوی فەرمی: خالید حنیفات وێڕای دووپاتکردنەوە لە دۆستایەتی لەگەڵ هەرێمی کوردستان، ستایشی بووژانەوە و پێشكەوتنەکانی كردووە كە سەرباری بوونی قەیران و گرفت و ئاستەنگی زۆر، لە ماوەیەكی كەمدا هاتوونەتە ئاراوە. داواشی كردووە پەیوەندییەكانی هەردوولا لە ئاست و بوارە جیاجیاكان، بەتایبەت كشتوكاڵ و ئاوەدانكردنەوە بەرفراوانتر ببن.

 

بۆچوونی بەرامبەر: بەپێی ڕاگەیێنراوێکی بارەگای بارزانی، سەرۆك بارزانی، شا عەبدوڵڵا، پاشای ئوردنی وەك دۆستێكی نزیك و برا وەسف كردووە،  وێڕای ئاماژەدان بە پەیوەندیە مێژووییەكانی نێوان هەرێمی كوردستان و شانشینی ئوردن، جەختی لە بەردەوامی و بەهێزتركردنی پەیوەندییەکان كردووەتەوە.

باکگراوند: ڕۆژی 25ـ-08-2024، بە سەرپەرشتيی سەرۆکوەزیران بارزانی، یاداشتێکی لێکتێگەیشتن لە نێوان هەرێمی کوردستان و شانشینی ئوردن لە بواری پەرەپێدانی هاریکاری و هەماهەنگیی کشتوکاڵی و پیشەسازيی خۆراک واژۆکرا و،  دەرگای بازاڕێکی نوێ بەڕووی بەرهەمی جووتیارانی هەرێمی کوردستان کرایەوە.