مەترسیی گەڕانەوەی حەشد بۆ کوڵەجۆ هەیە و پێشمەرگەی لێ جێگیر دەکرێت

ئاڤا نیوز

 

فەرماندەیەکی پێشمەرگە وردەکاریی چوونی هێزەکەی حەشدی شەعبی بۆ سنووری کوڵەجۆ ئاشکرا دەکات و دەڵێت، ئەو هێزانە لە سنووری کێڵگە نەوتییەکان سەنگەریان لێدابوو، ئێستاش مەترسی دووبارە گەڕانەوەیان بۆ ناوچەکە هەیە.

 

وێنە گەورەکە: ڕۆژی یەکشەممە 26-08-2024، هێزێکی زۆری حەشدی شەعبی لە دیالەوە بە  ئۆتۆمبێل و هەمەری سەربازی چوونە ناحیەی کوڵەجۆ و دەستیان بەسەر کێڵڵگەیەکی نەوتدا گرت، دوای کاردانەوەکان و مانەوە بۆ ماوەی نزیکەی هەشت کاتژمێر هێزەکە بەتەواوی کشایەوە و گەڕاوەتەوە شوێنی پێشووتری.

 

لێدوانی فەرمی: ڕائید سەردار مالومەیی، جێگری فەرماندەی فەوجی سێی لیوای پێنجی پیادەی هێزی پێشمەرگە بە ئاڤا نیوزی گوت: "چوار لیوای حەشدی شەعبی کە زیاتر لە چوار هەزار چەکدار بوون، جۆرەها چەکی قورسی وەک تۆپ و ڕاجیمەیان پێبوو هاتبوون بۆ بیرە نەوتەکانی قەمبەر".

 

ڕووداوەکە بەم شێوەیە بوو: پێش چوونی هێزەکە چەکدارانی حەشدی شەعبی بە ماتۆڕسکیل ڕۆشتوون و سەیری شوێنەکەیان کردووە، دوای ئەوەی دڵنیابوونەتەوە تەنیا شەش پۆلیسی نەوت و گازی لێیە، هێزەکە بەناو سوپادا تێپەڕیون و چوونەتە کێڵگە نەوتییەکە کە دەکەوێتە باکووری گوندەکە.

 

زانیاریی زیاتر: بۆشاییەکی ئەمنی لە باکووری گوندی سەید مەدریکی سەربە ناحییەی کوڵەجۆ بەرەو ڕێگەی زەرداو و بیرەنەوتەکانی قەمبەر هەیە، مەودای سەنگەرەکانی سوپای عێراق لەگەڵ پێشمەرگە 50 مەترە، هێزەکەی حەشدی شەعبی بە سەنگەرەکانی سوپای عێراق ڕۆشتوون و خۆیان گەیاندووتە بیرە نەوتەکانی قەمبەر و بۆشاییە ئەمنییەکە.

 

ئەوەی پێویستە بیزانیت: هێزەکەی حەشد وێنەی قاسم سولەیمانی و ئەبو مەهدی موهەندیس بەسەر سنگیانەوە بوو و وێنەی خومەینی و عەلی خامنەیشیان بە ئۆتۆمبێلەکانیانەوە هەڵواسیوە.

 

قووڵتر: هێزەکەی حەشدی شەعبی دوای گەیشتنی بە کێڵگەی نەوتی قەمبەر سەنگەری لێداوە تاوەکو بمێنێتەوە، بەڵام دواتر هێزەکانی پێشمەرگە گەمارۆی ناوچەکەیان دا و هێزەکەی حەشدی شەعبیان ناچار بە کشانەوە کرد و جێگەیان پڕکردنەوە.

 

مەترسییە چاوەڕوانکراوەکان: هێزەکانی پێشمەرگە لە کێڵگەی نەوتی قەمبەر و ناوچەکە بڵاوبوونەتەوە، بەپیێ قسەی ئەو فەرماندەیە، هێشتا مەترسی و ئەگەری دووبارە گەڕانەوەی ئەو هێزانە هەر ماوە.