ئەركی ڕاوێژكاری ناتۆ لە عێراق فراوان دەكرێت

ئاڤا نیوز 

 

ڕاوێژکاری ئاسایشی نیشتمانی عێراق بۆ تاوتوێکردنی پەیوەندییەکان و برەودان بە هاوکاریی هاوبەش، سبەینێ لەگەڵ بەرپرسانی ناتۆ لە برۆکسل کۆدەبێتەوە.

 

وێنە گەورەکە: هاوپەیمانی باکوری ئەتڵەسی "ناتۆ" لە ساڵی 2018ەوە لەسەر داواکاری حکومەتی عێراق بنکەی ڕاوێژکاری لە بەغدا کردووەتەوە و لەبوارەکانی پلانی بەرگریی، ئاسایشی ئەلیکترۆنی، ڕێگری لە گەندەڵی و بەهێزکردنی بنەماکانی حکومڕانی لەسەر بنەمای یاسا، ڕاوێژ پێشکەش بە وەزارەتەکانی ناوخۆ و بەرگریی دەکات.

 

ڕاگەیێنراوی فەرمی: ئەنجوومەنی ئاسایشی نیشتمانی بڵاویکردەوە: قاسم ئەعرەجی، ڕاوێژکاری ئاسایشی نیشتیمانی عێراق ئەمڕۆ بەسەرۆکایەتیی شاندێکی باڵا، سەردانی برۆکسلی پایتەختی بەلجیکای کردووە و بەشداری لە یەکەمین گفتوگۆی باڵا لەگەڵ هاوپەیمانی باکوری ئەتڵەسی "ناتۆ" دەکات.

 

زانیاریی زیاتر: جگە لە کۆبوونەوە لەگەڵ بەرپرسانی ناتۆ، شاندەکەی عێراق لەگەڵ لێپرسراوانی یەکێتی ئەوروپا و بەلجیکاش کۆدەبێتەوە.

 

بۆچی گرنگە: عێراق و ناتۆ دەیانەوێت گفتوگۆ بکەن لەسەر فراوانکردنی ئەرکی ڕاوێژکاری ناتۆ لە بەغدا، باشترکردنی هاریکارییەکان، دانانی پلانی درێژخایەن و پرسی کارکردنی ناتۆ لەگەڵ هێزە ئەمنییەکانی دیکەی عێراق.