هۆشدارییەک بۆ خاوەنی ئەو ئۆتۆمبێلانەی هەڵگری تابلۆی "دوبەی"ن

ئاڤا نیوز 

لەسەر زۆربوونی ئەو ئۆتۆمبێلانەی هەڵگری تابلۆی "دوبەی" ن لە هەرێمی کوردستان، هاتووچۆی هەولێر و بەڕێوەبەرایەتی گشتیی گومرگ ڕوونکردنەوە دەدەن.

وێنە گەورەکە: ماوەیەکە ژمارەی ئەو ئۆتۆمبێلانەی هەڵگری تابلۆی وڵاتی ئیماراتن لە هەولێر بە بەراورد بە پێشتر زۆربوون.

لێدوانی فەرمی: عەقید هێمن ئەمین، گوتەبێژی بەڕێوەبەرایەتی هاتووچۆی هەولێر، بە ئاڤا نیوزی گوت: ئەو کەسانەی مۆڵەتی نیشتەجێبوون (ئیقامە)ی دوبەیان هەیە و ئۆتۆمبێلی ژمارە دوبەی دەهێننە هەرێمی کوردستان، بۆ ماوەیەکی کاتییە و دەبێت دواتر بیگەڕێننەوە ئەو وڵاتە.

زانیاریی زیاتر: ژمارەی هەرێمی کوردستان بە ئۆتۆمبێلی دوبەی نادرێت، ئەو کەسەی لەسنوور ئۆتۆمبێلەکەی بەناوی خۆی داخڵ کردووە پێویستە لای خۆی بێت، ئەگەر هەر کەسێکی دیکە ئۆتۆمبێلەکە لێبخوڕێت، ئەوا دەستی بەسەردا دەگیرێت. عەقید هێمن ئەمین ئەمەشی گوت.

لە لایەکی دیکەوە: جەوهەر مەحموود، جێگری بەڕێوەبەری گشتیی گومرگ، بە ئاڤا نیوزی گوت: بەگوێرەی ڕێنمایی گومرگی وەزارەتی دارایی خاڵی 19 بەشی پێنجەم ژمارە حەوتی ساڵی 2020، هاووڵاتی عێراقی ئۆتۆمبێلی وڵاتێکی دیکە بهێنێت و بیەوێت لێرە تۆماری بکات، ئەوا هەموو مەرجەکانی داخڵبوونی ئۆتۆمبێلی لەسەر تۆمار دەکرێت، دەبێت لەو وڵاتە ژمارەی ئۆتۆمبێلەکەی سڕابێتەوە.