عێراق فەرمانی دامەزراندنی بۆ زیاتر لە چوار هەزار خاوەن بڕوانامەی ماستەر دەرکرد

ئاڤا نیوز

 

وەزارەتی خوێندنی باڵا و توێژینەوەی زانستی عێراق فەرمانی دامەزراندنی بۆ زیاتر لە چوار هەزار خاوەن بڕوانامەی ماستەر لەسەر میلاکی وەزارەتەکەی دەرکرد.

 

وێنە گەورەکە: دامەزراندن لە عێراق لەسەر ئاستی وەزارەتە جیا جیاکان بەردەوامە، ئەنجوومەنی گشتیی ڕاژە لە عێراق هەفتانە فەرمانی دامەزراندن بۆ سەدان دەرچوو لەسەر میلاکی وەزارەت و پارێزگاکان دەردەکات، لە ناوەڕاستی ئەم مانگەش وەزارەتی دارایی عێراق ڕەزامەندی لەسەر دامەزراندنی زیاتر لە 29 هەزار دەرچووی بەشە پزیشکییەکان لەسەر میلاکی وەزارەتی تەندروستی دا.

 

ڕاگەیێنراوی فەرمی: وەزارەتەکە ڕایگەیاند: بە پشتبەستن بە بڕیار و یاسا کارپێکراوەکان نەعیم عەبودی، وەزیری خوێندنی باڵا و توێژینەوەی زانستی فەرمانێکی وەزاری دەرکرد بە دامەزراندنی چوار هەزار و 129 خاوەن بڕوانامەی ماستەر لەسەر میلاکی وەزارەتەکە.

 

زانیاریی زیاتر: وەزارەتەکە بانگهێشتی ئەو کەسانە دەکات کە ناویان بڵاوکراوەتەوە بۆ سەردانیکردنی ناوەندەکانی ڕاوێژکاری لە زانکۆکان، بۆ تەواوکردنی ڕێکارەکانی دامەزراندن.

 

ئەوەی پێویستە بیزانیت: ئەو دامەزراندنە تەنیا ئەو کەسانە لێی سوودمەندن، کە خەڵکی پارێزگاکانی عێراق و ناوچە کوردستانییەکانی دەرەوەی هەرێمی کوردستانن، جا لە هەر زانکۆیەکی عێراق و کوردستان بڕوانامەکەیان بەدەست هێنابێت.