ئیسرائیل: سینوار لە ژێر زەوی خۆی حەشارداوە

ئاڤا نیوز 

ڕۆژنامەی نیویۆرک تایمز ئاشکرایکردووە، ئیسرائیل توانیویەتی لە ناو تونێلەکانەوە چاودێری پەیوەندییەکانی یەحیا سینوار، سەرۆکی  بزووتنەوەی حەماس بکات، بەڵام لە دیاریکردنی شوێنەکەیدا سەرکەوتوو نەبووە.

وێنە گەورەکە: یەحیا سینوار، یەکێكە لە سەرکردە دیارەکانی بزووتنەوەی حەماس کە لەلایەن ئیسرائیلەوە داواکراوە، ڕاستەوخۆ دوای هێرشەکانی حەوتی ئۆکتۆبەری ساڵی ڕابردوو، هەواڵگریی سەربازی ئیسرائیل و دەزگای ئاسایشی ناوخۆی ئیسرائیل شانەیەکیان پێکهێنا کە تاکە ئەرکی دۆزینەوەی سینوارە.

زانیاریی بەدەستهاتوو: نیویۆڕک تایمز بە وەرگرتنی زانیاری لە سەرچاوە ئەمریکی و ئیسرائیلییەکان زانیویەتی، ئیسرائیل هەوڵیداوە لە ڕێگەی پەیوەندییە تەلەفۆنییەکانییەوە شوێنی سینوار دیاری بکەن، زانراوە کە لە ژێرزەویدایە، بەڵام نەتوانراوە ناوچەکەی دیاریبکرێت.

زانیاریی بەدەستهاتوو: ئەمریکا ڕاداری زەمینی بۆ ئیسرائیل دابین کردووە بۆ ئەوەی یارمەتی بەدواداچوونی سینوار و سەرکردەکانی دیکەی حەماس بدات، کە دەتوانێت نەخشەی سەدان میل لە تونێلەکانی ژێر غەززە بکێشێت، ئەمەش بۆ دروستکردنی وێنەیەکی وردتری تونێلەکانی حەماس.