عێراق داوای داخستنی کەمپی هۆل لە ڕۆژئاوای کوردستان دەکات

ئاڤا نیوز 

ڕاوێژکاری ئاسایشی نیشتیمانی عێراق، داوا لە وڵاتانی جیهان دەکات ژن و منداڵی چەکدارانی داعش لە کەمپی هۆلەوە بۆ وڵاتەکانیان بگەڕێننەوە، مانەوەی کەمپەکەش بە هەڕەشە لەسەر ناوچەکە و جیهان ناودەبات.

وێنە گەورەکە: کەمپی هۆل گەورەترین کەمی ژن و منداڵی خێزانەکانی داعشە لە ڕۆژئاوای کوردستان و نزیکەی 50 هەزار ژن و منداڵی لە دەیان ڕەگەزنامەی وڵاتانی جیهان تێدا ڕاگیراوە، لەو ژمارەیەش ئەوانەی بە ڕەگەز عێراقین ژمارەیان دەگاتە 20 هەزار کەس و تائێستاش نۆ هەزار کەسیان بۆ عێراق گەڕێنراونەتەوە.

لێدوانی فەرمی: قاسم ئەعرەجی، ڕاوێژکاری ئاسایشی نیشتیمانی عێراق لە کۆبوونەوەیدا لەگەڵ کیرت بێرکوتیرین، سەرۆکی دەزگای هەماهەنگی بەلجیکا بۆ شیکردنەوەی هەڕەشەکان (OCAM) لە برۆکسل، ئاماژەی بەوەکردووە، بەپێویستی دەزانێت دۆسیەی کەمپی هۆل چارەسەر بکرێت و ژن و منداڵی چەکدارانی داعش بۆ وڵاتەکانیان بگەڕێنرێنەوە.

زانیاریی زیاتر: "دەستخۆشی لە بەلجیکا دەکەین کە  ژن و منداڵی چەکدارانی داعشی بۆ وڵاتەکەی گەڕاندووەتەوە، داواش دەکەین هەموو وڵاتان هەمان هەنگاو بنێن تا کەمپەکە دابخرێت و ئەو مەترسییە لەسەر ناوچەکە و جیهان دووربخرێتەوە". قاسم ئەعرەجی وای گوتووە.