دوو مانگ مۆڵەت دەدرێتە کاسبکارانی مەیدانی ئاژەڵانی سلێمانی

ئاڤا نیوز 

 

قایمقامیەتی سلێمانی دوو مانگ مۆڵەتی داوەتە کاسبکارانی مەیدانی ئاژەڵان بۆئەوەی شوێنەکانییان بگوازنەوە، ئەوانیش دەڵێن"بەبێ قەرەبوو ناچارمان دەکەن بیگوازینەوە".

 

وێنە گەورەکە: بەگوێرەی ڕێنماییە پزیشکییەکان و ڤێتێرنەرییەکان پێویستە شوێنی مەیدانی ئاژەڵان دوور لە شوێنی نیشتەجێبوون بێت و مەرجە تەندروستییەکانیان تێدا بێت.

 

لێدوانی فەرمی: فاروق حاجی ئەحمەد، دووکاندار لە مەیدانی ئاژەڵانی سلێمانی بە ئاڤا نیوزی گوت:" ئێمە 70 دووکاندارین لەشوێنی کارکردنی خۆمان دەرمان دەکەن بەبێ ئەوەی هیچ قەرەبوویەک بکرێینەوە، من پێنج دووکانم هەیە و بە گواستنەوەی زیانی 30 هەزار دۆلارم بەردەکەوێت، ناچارمان دەکەن بچینە مەیدانی نوێی ئاژەڵان لە گوندی یەکمالەی عەربەت و بۆ هەر خانێک، کە پێمان دەفرۆشن دەبێت 25 ملیۆن دینار بدەین.

 

لەلایەکی دیکەوە: سەبارەت بە کێشەی مەیدانی ئاژەڵانی سلێمانی ئاوات محەممەد، قایمقامی سلێمانی بە ئاڤا نیوزی گوت: بەهۆی فراوانبوونی شاری سلێمانی و نزیکبوونەوەی خانووی نیشتەجێبوون لە مەیدانەکە و پابەندبوون بەڕێنماییە ڤێتێرنەرییەکان ناچارین بڕیاری گواستنەوەی مەیدانی ئاژەڵان جێبەجێ بکەین.

 

زانیاریی زیاتر: ئاوات محەممەد دەڵێت: ئەوەی لە بەرژەوەندی دووکاندارەکان بێت ئەوە دەکەین، ماوەی دوو مانگ مۆڵەتیان پێدەدەین تا بیگوازنەوە شوێنە نوێیەکە.