وەزارەتی دارایی لەبارەی دابەشنەکردنی مووچە ڕوونکردنەوە دەدات

ئاڤا نیوز

وەزارەتی دارایی و ئابووریی هەرێمی کوردستان لەبارەی ناردنی نزیکەی 550 ملیارەکە لەلایەن بەغدا و ڕانەگەیاندنی لیستی مووچە ڕوونکردنەوە دەدات و هۆکارەکەی ئاشكرا دەکات.

وێنە گەورەکە: وەزارەتی دارایی عێراق لەکاتێکدا مووچەی مانگی حەوتی ناردووە، دوێنی سێشەممە  549 ملیار و 572 ملیۆن دیناری بۆ مووچەی مانگی هەشتی فەرمانبەرانی مەدەنی نارد، بەڵام وەزارەتی دارایی و ئابووری هەرێمی کوردستان لیستی دابەشکردنی مووچەی ڕانەگەیاند.

لێدوانی فەرمی: ئێستا شاندێکی هەرێمی کوردستان بۆ  چارەسەرکردنی پرسی مووچە لە بەغدایە، سەرچاوەیەک لە وەزارەتی دارایی و ئابووری بە ئاڤا نیوزی گوت: لەڕێگەی ئەو شاندەوە کۆمەڵێک هۆکار و پاساومان بۆ ڕوون دەبێتەوە لەبارەی مووچەی مانگی حەوت، ئەمڕۆش ڕوونکردنەوەیەک لەمبارەیە بڵاودەکەینەوە بۆچی لیستی مووچە ڕاناگەیێنین و گرفتەکان دەخەینەڕوو".

 

زانیاریی زیاتر: سەرچاوەکەی ئاڤا باسی لەوە کرد "یەکێک لە هۆکارەکانی نەناردنی مووچە نەبوونی بایۆمەترییە، حکومەتی  عێراق وا لێکی داوەتەوە ئەو مووچەخۆرانەی بایۆمەترییان نییە وەهمین، بەڵام لەڕاستیدا وانییە و کۆمەڵێک هۆکاری لەپشتە".

 

خاڵی نەرێنی: لەکۆی نزیکەی 950 ملیار دیناری مووچە، بەغدا  تەنیا 36 ملیار دیناری وەک مووچەی مانگی حەوت بۆ چەند توێژێک ناردووە، سەرچاوەکەی ئاڤاش باسی لەوە کرد تائێستا ڕوون نییە چارەنووسی چی لێدێت؟