شاندی هەرێمی کوردستان و وەزیری دارایی عێراق لەبارەی مووچە کۆدەبنەوە

ئاڤا نیوز 

 

شاندی وەزارەتی دارایی هەرێمی کوردستان دوانیوەڕۆی ئەمڕۆ پێنجشەممە لەگەڵ وەزیری دارایی عێراق کۆدەبنەوە و  پرسی مووچەی مانگی حەوت و هەشت یەکلایی دەکەنەوە.

 

وێنە گەورەکە: دوو ڕۆژە شاندی وەزارەتی دارایی و ئابووریی هەرێمی کوردستان لە بەغدایە، کە پێکهاتووە لە پێنج بەڕێوەبەری گشتیی (ژمێرکاری، دیوانی چاودێریی دارایی، داتا و ئامار، بەڕێوەبەری بودجە و جووڵەی دراو) لە بەغدان، دوێنی چەند کۆبوونەوەیەکی تەکنیکیان لەگەڵ هاوتاکانیان لە وەزارەتی دارایی عێراق کردووە و لێکتێگەیشتن بۆ چارەسەری پرسی مووچەی مووچەخۆرانی هەرێمی کوردستان هەیە.

 

ئەوەی پێویستە بیزانیت: لە کۆبوونەوەی دوێنی چوارشەممە شاندی وەزارەتی دارایی هەرێمی کوردستان بەڵێنی ناردنی پارەی مووچەی هێزە ئەمنییەکانیان بۆ مانگەکانی حەوت و هەشت وەرگرتووە، لەسەر مووچەی مانگی حەوت و هەشتی فەرمانبەرانی مەدەنیش لێکتێگەیشتن هەیە، بەڵام تاوەکو ئێستا جگە لە 36 ملیار هیچ بڕە پارەیەک بۆ هەرێمی کورستان نەنێردراوە.

 

 زانیاریی تایبەت: یەکێک لە ئەندامانی شاندی هەرێمی کوردستان بە ئاڤا نیوزی گوت، "د. فوئاد حسێن، جێگری سەرۆکوەزیرانی عێراق، وەک نوێنەری سوودانی سەرپەرشتی کۆبوونەوەی نێوان شاندی هەرێمی کوردستان و تەیف سامی، وەزیری دارایی عێراق دەکات و کۆبوونەوەکە کاتژمێر 11:00 دەکرێت."