لە دوو شوێنی تورکیا نەوت دەدۆزرێتەوە

ئاڤا نیوز 

لە دوو ناوچەی شاری بایبورتی تورکیا، سەرەداوی دۆزینەوەی بیرە نەوتی نوێ بەدەستهاتوون، نموونەی وەرگیراوی نەوتە دۆزراوەکە بەمەبەستی لێکۆڵینەوە رەوانەی تاقیگە کراوە.

چیرۆکی سەرەکی: لە گەڕان و بەدواداچوونی تیمی پ. د. نافیز مادێن، سەرۆکی بەشی جیۆفیزیکی لە زانکۆی گوموشهانێ بۆ دۆزینەوەی نەوت لەم شوێنانەی هەڵقولانی نەوتی لێ بەدیکراوە، لە هەردوو گوندی ئولوچایەر و کوربانپناری سەر بە شاری بایبورتی تورکیا، نموونەی ئەو نەوتە وەرگیراوە و بەمەبەستی لێکۆڵینەوەی رەوانەی سەنتەری لێکۆلێنەوەی هاوبەشی نەوتی تورکیا کراوە.

ئەوەی پێویستە بیزانیت:  لە رابردوودا هەوڵی وەبەرهێنانی ئەو نەوتە دراوە کە لەشاری بایبوت دۆزراوەتەوە، بەڵام ئەنجامی لێکۆڵینەوەکان دەریانخستبوو نەوتەکە بەپێی پێویست نییە.

لێدوانی فەرمی: پرۆفیسۆر مادێن رایگەیاند، بە فراوانکردنی لێکۆڵینەوەکان و ئامرازەکانی بەدواداچوون، هەروەها ئەو زانیارییانەی بەدەستمان هێناوە، لە داهاتوویەکی نزیکدا بریاری وەبەرهێنان لەم شوێنانە رادەگەیێنین کە نموونەکانی لێوەرگیراوە.

ئەمەش بزانە: لەگەڵ دۆزینەوەکانی بایبوت، ئێستا چاوەکان لەسەر دۆزینەوەی نەوتی ناحیەی مواردیەی شاری وانە  لە باكووری كوردستان، بەدۆزینەوەی نەوت لە وان، تورکیا دەچێتە قۆناغێکی دیکەی بەرهەمهێنانی نەوت.