هەڕەشەی بڵاوکردنەوەی ڤیدیۆیان لە ژنان کردبوو، ئاسایشی هەولێر دەستگیری کردن

ئاڤا نیوز  

بەڕێوەبەرایەتی ئاسایشی هەولێر دەستگیرکردنی دوو تۆمەتباری ڕاگەیاند، کە بەناوی سەنتەری جوانکارییەوە هەڕەشەیان خستبووە سەر ژیانی چەند ژنێک.

وێنە گەورەکە: لەماوەی ڕابردوودا ئاسایشی هەولێر چەند جارێک هاونیشتمانیانی ئاگادار کردووەتەوە، لەکاتی بوونی هەر جۆرە هەڕەشەیەک لەسەر ژیانیان ئاسایشی لێ ئاگادار بکەنەوە.

ڕاگەیێنراوی فەرمی: ئێوارەی ئەمڕۆ هەینی ئاسایشی هەولێر ڕایگەیاند: دوو کەسیان دەستگیرکردووە لە تۆڕی کۆمەڵایەتی فەیسبووک هەژمارێکی ساختەیان داناوە بەناوی "سەنتەری جوانکاری سام"، لەڕێگەی ئەو هەژمارەوە وێنە و ڤیدیۆی چەند ژنێکیان لای خۆیان تۆمارکردووە، دواتر هەڕەشەی ئەوەیان لە ژنەکان کردووە، ئەگەر پارە نەدەن ڤیدیۆکانیان بڵاودەکەنەوە.

زانیاریی زیاتر: ئاسایشی هەولێر دەڵێت: دوای لێکۆڵینەوەی ورد، ناسنامەی دوو تۆمەتبار بەناوەکانی (أ ، ج ، م) و( هـ ، أ ، م) ئاشکرا بوون و بەهەماهەنگی لەگەڵ (بەڕێوەبەرایەتی ئاسایشی سۆران) دەستگیر کران.

ئەوەی پێویستە بیزانیت: ئاسایشی هەولێر داوا لە هاونیشتمانیان دەکات، لە تۆڕە کۆمەڵایەتییەکان ئاگاداری پەیوەندیەکانیان بن، هەر بابەتێک پەیوەندی بە ژیانی تایبەتی خۆیانەوە هەیە بۆ هیچ کەسێکی ڕەوانە نەکەن.