ئەڵمانیا ڕێژەی دیپۆرتکردنەوەی پەنابەران زیاد دەکات

ئاڤا نیوز

 

ئاماری دەزگای لوتکە دەریدەخات، لە شەش مانگی یەکەمی ئەمساڵ، دیپۆرتکردنەوەی پەنابەران لە ئەڵمانیاوە بۆ وڵاتەکانی خۆیان بە ڕێژەی %17 بەرزبووەتەوە.

 

وێنە گەورەکە: بەهۆی زۆری ژمارەی پەنابەران، بەشێک لە وڵاتان میکانیزمی دیپۆرتکردنەوەی ئەو پەنابەرانەیان دەستپێکردووە کە داواکاریان بۆ وەرگرتنی مافی پەنابەری ڕەتکراوەتەوە.

 

ڕاگەیێنراوی فەرمی: دەزگای لوتکە بۆ کاروباری پەنابەران، ئەمڕۆ شەممە ئاماری نیوەی یەکەمی ئەمساڵی دیپۆرتکردنەوەی لە ئەڵمانیا بڵاوکردەوە، بەگوێرەی ئامارەکە، نۆ هەزار و 500 کەس لەو وڵاتە دیپۆرتکراونەتەوە، بەڵام لە هەمان ماوەی ساڵی ڕابردوو تەنیا حەوت هەزار و 861 کەس دیپۆرتکرابوونەوە، ئەمەش بەو واتایەی ڕێژەی دیپۆرتکردنەوە %17 زیادیکردووە.

 

زانیاریی زیاتر: بەپێی ئامارەکان، ئەوانەی هەڵگری ڕەگەزنامەی تورکیا بوون لە ڕیزبەندی یەکەمن و 915 کەسیان دیپۆرتکراوەتەوە، دوای ئەوان هەڵگرانی ڕەگەزنامەی جۆرجیا 839 کەسیان لێ دیپۆرتکراوەتەوە، هەڵگرانی ڕەگەزنامەی باکووری مەکدۆنیا 774 کەس، هەڵگرانی ڕەگەزنامەی ئەفغانی 675 کەس، ئەلبانی 586 کەس و سووری 534 کەسیان لێ دیپۆرتکراوەتەوە.

 

ئەوەی پێویستە بیزانیت: بەهۆی ئەوەی مافی پەنابەریان ڕەتکراوەتەوە، تا کۆتایی حوزەیرانی ئەمساڵ، 226 هەزار و 882 کەس ئەڵمانیایان بەجێهێشتووە، هاوکات 44 هەزار و 155 کەس ئاگاداریان پێدراوە پێویستە دەستبەجێ ئەڵمانیا بەجێبهێڵن، بەشی زۆریان بەهۆی نزیکیان بووە لە ڕێکخراوە تیرۆرستییەکان، لەگەڵ ئەوەدا 14 هەزار حاڵەتی هەڵوەشانەوەی دیپۆرتکردنەوە هەبووە بە هۆکاری جیاواز.