سەرکردەیەکی حەشدی شەعبی لەسەر مووچە هەڕەشە لە حکومەتی عێراق دەکات

ئاڤا نیوز

بەهۆی دواکەوتنی مووچەی چەکدارانی حەشدی  شەعبی و بڵاوبوونەوەی بڕینی  مووچەکەیان لەلایەن حکومەتی عێراق، سەرکردەیەکی گرووپەکە هەڕەشەی تووند لە حکومەتی عێراق دەکات.

وێنە گەورەکە: بەراورد بە مانگەکانی ڕابردوو چەند ڕۆژێکە مووچەی حەشدی  شەعبی دواکەوتووە، لە تۆڕە کۆمەڵایەتییەکانیش وابڵاوکرایەوە لەلایەن وەزارەتی دارایی عێراق بەیەکجاری مووچەیان ڕاگیراوە.

 

لێدوانی فەرمی: لە یەکەم کاردانەوەدا عەبدولعەزیز محەممەداوی ناسراو بە 'ئەبو فەدەک'، سەرۆکی ئەرکانی دەستەی حەشدی شەعبی ڕایگەیاند: "دەست بۆ مووچەی حەشدی شەعبی ببەن و بیبڕن، دەوڵەتی عێراق ڕادەگرم".

لەلایەکی دیکەوە: د.خەلیل دۆسکی، ئەندامی لیژنەی دارایی پەرلەمانی عێراق بە ئاڤا نیوزی گوت: "خەرجکردنی پارەی حەشد لەبەر نەبوونی نەختینە دواکەوتووە، چونکە هەموو مانگێک تەیف سامی، وەزیری دارایی عێراق سەیری لیستەکان دەکات و هەر گۆڕانکارییەک هەبێ بەوردی لەسەری دەوەستێت، هەندێک ئەگەری دیکە هەن نازانین چین".

بۆچوونی بەرامبەر: وەزارەتی دارایی عێراق لە ڕاگەیێنراوێکدا دووپاتی کردەوە، ئەو هەواڵانەی لە تۆڕە کۆمەڵایەتییەکان لەبارەی دواکەوتنی خەرجکردنی مووچەی حەشدی شەعبی بڵاوبوونەتەوە ناڕاستن  و  ڕۆژی یەکشەممە پارەیان بۆ خەرج دەکرێت.

باکگراوند: تەمەنی حەشدی شەعبی زیاتر لە 10 ساڵە و لە 70 گرووپی جیاواز پێکهاتووە، بەپێی لێدوانە فەرمییەکانی خۆیان ساڵی ڕابردوو ژمارەی کارمەند و چەکدارانیان 200 هەزار بووە، بەڵام لەڕاستیدا ژمارەیان زۆر لەوە زیاترە. بۆ ئەمساڵیش لە بودجەی عێراقدا تەنیا بۆ مووچە  بڕی  سێ تريلۆن و 868 مليار و 194 مليۆن ديناری بۆ تەرخان کراوە.