ڕەوتی حیکمە هەڵبژاردنی پێشوەختە ڕەتدەکاتەوە

ئاڤا نیوز

ئەندامێکی ڕەوتی حیکمە پێیوایە، دۆخی سیاسی ئێستای عێراق پێویستی بە هەڵبژاردنی پێشوەختە نییە.

 

وێنە گەورەکە: لە مانگی حوزەیرانی ئەمساڵ نووری مالیکی، سەرۆکی هاوپەیمانیی دەوڵەتی یاسا لە چاوپێکەوتنێکدا داوای هەڵوەشاندنەوەی پەرلەمانی عێراق و ئەنجامدانى هەڵبژاردنی پێشوەختەی کرد.

لێدوانی فەرمی: سامی جیزانی، ئەندامی  ڕەوتی حیکمە بە ئاڤا نیوزی ڕاگەیاند، ئەنجامدانی هەڵبژاردنی پێشوەختە یەکێکە لە خاڵەکانی کارنامەی حکومەتەکەی محەممەد شیاع سوودانی، هەرکاتێک نا سەقامگیری سیاسی و گەیشتن بە بنبەست دروست بوو، ئەوکات پێویستە هەڵبژاردنی پێشوەخت بکرێت.

 زانیاریی زیاتر: بەگوتەی جیزانی کە ڕەوتەکەی لەگەڵ هاوپەیمانی نەسر هاوپەیمانە و بە هەردووکیان خاوەنی 11 کورسین لە پەرلەمانی عێراق، ئێستا دۆخی سیاسی، خزمەتگوزاری و حکومەتیش سەقامگیرە و پێویست بەوە ناکات هەڵبژاردنی پێشوەخت بکرێت،  ئەم پرسە کۆدەنگی نیشتیمانیشی لەسەر نییە و ڕەوتی حیکمەش لەگەڵ هەڵبژاردنی پێشوەختەدا نییە.