367 خێزانی ئاوارەی شنگال گەڕانەوە ناوچەکانیان

ئاڤا نیوز  

 367 خێزانی ئاوارە بۆ شنگال دەگەڕێنەوە و هاوکاریی داراییان پێشکەش دەکرێت.

لێدوانی فەرمی: پیر دەیان، بەرێوبەری کۆچ و کۆچبەران لە دهۆک بە ئاڤا نیوزی گوت: لە دوای بڕیاری عێراق بۆ بەخشینی هاوکاری دارایی بە ئاوارەکان، نۆ هەزار خێزان گەڕاونەتەوە، ژمارەی ئەو خێزانانەشی لە کەمپەکانی دهۆک و زاخۆ ماونەتەوە، 22431 خێزانن،  37600 خێزانیش لە دەرەوەی کەمپەکان دەژین.

لە لایەکی دیکەوە: وەزارەتی کۆچ وکۆچبەرانی عێڕاق ڕایگەیاند: 367 خێزان کە بەم دواییانە گەڕاونەتەوە ناوچەكانیان لە شنگال، خراونەتە نێو بەخشینێکی وەزارەتی کۆچ و کۆچبەرانی عێراق، وا بڕیارە بڕی چوار ملیۆن دیناریان پێشکەش بکرێت.

ئەوەی پێویستە بیزانیت: ژمارەیەکی زۆر لە کەمپەکانی ژێر دەسەڵاتی حکومەتی عێراق داخراون و ئاوارەکان گەڕاونەتەوە بۆ شوێنەکانیان، بەڵام لە هەرێمی کوردستان 34 کەمپ هەیە و حکومەتی هەرێمی کوردستان نایەوێت بە زۆر دابخرێن.

باکگراوند: ڕۆژی سێی ئابی 2014 چەکدارانی ڕێکخراوی "داعش" هێرشیان بۆ سەر قەزای شنگال و گوندەکانی دەستیپێکرد و 400 هەزار خێزان ئاوارەی هەرێمی کوردستان و پارێزگای نەینەوا بوون.