دیندار زێباریی: ڕاسپاردەكانی ئازادی ڕۆژنامەگەریی لە 70٪ جێبەجێكراون

ئاڤا نیوز

 ڕێکخەری راسپاردە نێودەوڵەتییەکانی حکومەتی هەرێمی کوردستان ڕایگەیاند، بەپێی ڕاپۆرتی بەراوردکاری پلانی هەرێمی ئاستی ئازادی ڕۆژنامەنووسی بە رێژەی ( 70٪) پێشکەوتنی بەخۆیەوە بینیوە.

ئەوەی پێویستە بیزانیت: لە ماوەی رابردوودا کونسوڵخانەی گشتیی ئەمریکا لە هەولێر رایگەیاند: ئەمریکا خۆشحاڵە بە کەمبوونەوەی بەرچاوی پێشێلکاریەکانی ئازادیی ڕاگەیاندن و پشتیوانی لە ژینگەیەک دەکات تێیدا ڕۆژنامەوانان بتوانن بە ئازادانە کاری خۆیان بکەن.

لێدوانی فەرمی: د. دیندار زێباریی، رێکخەری راسپاردە نێودەوڵەتییەکان لە حکومەتی هەرێمی کوردستان گوتی: لە پلانی حکومەتی هەرێم بۆ مافەکانی مرۆڤ (11) راسپاردە تایبەتن  بە ئازادی رۆژنامەنووسی، لە ساڵی 2022 تەنیا  یەک راسپاردە جێبەجێکرابوو  لە ساڵی 2023 دا  حەوت ڕاسپاردە جێبەجێکراون و یەک راسپاردە جێبەجێ نەکراوە و سێ ڕاسپاردە لە قۆناغی جێبەجێکردندا بوون.

"بەم پێیەش جێبەجێکردنی ڕاسپاردەکانی بواری ئازادی ڕۆژنامەگەریی لە پڕۆسەی جێبەجێکردنی پلانەکە بە رێژەی زیاتر لە (70 ٪) زیادی کردووە و ڕاگەیێنراوی ڕێکخراوەکانی داکۆکیکار لە مافی رۆژنامەنووسی گەواهیدەری ئەم پێشکەوتنەن".