سەرۆککۆماری ئێران سەردانی هەرێمی کوردستان دەکات

ئاڤا نیوز 

 

ناوەڕاستی ئەم مانگە سەرۆککۆماری ئێران سەردانی عێراق و هەرێمی کوردستان دەکات و ژمارەیەک یاداشتی لێکتێگەیشتن لە بواری ئەمنی لە نێوان بەغدا و تاران واژۆ دەکرێن.

 

وێنە گەورەکە: 8ـی تەمموزی ئەمساڵ محەممەد شیاع سوودانی، سەرۆکوەزیرانی عێراق بانگهێشتنامەیەکی ئاراستەی مەسعود پزیشکیان، سەرۆککۆماری ئێران کرد بۆ ئەوەی سەردانی بەغدا بکات بە ئامانجی "بەهێزکردنی پەیوەندییە دووقۆڵییەکان و گفتوگۆکردن لەسەر ژمارەیەک دۆسیەی گرنگ".

 

لێدوانی فەرمی: محەممەد کازم ئال سادق، باڵیۆزی ئێران لە عێراق بە ئاژانسی هەواڵی مهری ڕاگەیاندووە: "مەسعود پزیشکیان، سەرۆککۆماری ئێران ناوەڕاستی ئەم مانگە سەردانی بەغدا و نەجەف و کەربەلا دەکات، ئەگەر دۆخەکەش گونجاوبێت، سەردانی بەسرە و هەولێریش دەکات".

 

زانیاریی زیاتر: عێراق وڵاتێکی گرنگە و پزیشکیان لە سیاسەتی دەرەوەیدا بایەخی پێدەدات، لەم سەردانەشدا لە بواری ئەمنیدا یاداشتی لێکتێگەیشتن واژۆ دەکرێت و بەدواداچوونیش بۆ پەیوەندییە ئابووریی و بازرگانییەکانی نێوان هەردوو وڵات دەکرێت.

 

باکگراوند: پێشتر لەلایەن نێچیرڤان بارزانی، سەرۆکی هەرێمی کوردستان بانگهێشتنامەی فەرمی پێشکەشی ئیبراهیم ڕەئیسی، سەرۆککۆماری کۆچکردووی ئێران کرابوو، لە مەراسیمی دەستبەکاربوونی مەسعود پزیشکیانیش وەک سەرۆککۆماری نوێ،  نیچێرڤان بارزانی بانگهێشتنامەی پێشکەشی ناوبراو کرد.