تورکیا کوژرانی 35 گەریلای پەکەکە و شەڕڤانی یەپەگەی ڕاگەیاند

ئاڤا نیوز

 

وەزارەتی بەرگریی تورکیا گیانلەدەستدانی 35 گەریلای پەکەکە و شەڕڤانی یەپەگە لە ماوەی چوار ڕۆژدا لە هەرێمی کوردستان و ڕۆژئاوای کوردستان ڕادەگەیێنێت.

وێنە گەورەکە: سوپای تورکیا لە ئۆپەراسیۆنە سەربازییەکانی لە ناوچەکانی مەتین، زاپ، گارە، خواکورک، قەندیل و ئاسۆس لە هەرێمی کوردستان و، بۆردوومانکردنی بنکە و بارەگاکانی یەپەگە لە ڕۆژئاوای کوردستان بەردەوامە.

 

ڕاگەیێنراوی فەرمی: وەزارەتی بەرگریی تورکیا ڕایگەیاند، لە چوار ڕۆژی ڕابردوودا 27 گەریلای پەکەکەیان لە ناوچە سنوورییەکانی هەرێمی کوردستان کوشتوون.

 

لەلایەکی دیکەوە: وەک لە ڕاگەیێنراوەکەدا ئاماژەی پێکراوە، لە بۆردوومانی فڕۆکە جەنگییەکانی تورکیا لە ناوچەی فوراتی ڕۆژئاوای کوردستان هەشت شەڕڤانی یەپەگە کوژراون.

 

بۆچوونی بەرامبەر: هەپەگە، باڵی سەربازیی پەکەکە لە ڕاگەیێنراوێکدا ڕایگەیاند: لە نێوان 3 تا 5 ـی ئەم مانگە 17 چالاکییان لە ناوچە سنوورییەکانی هەرێمی کورسستان دژی سوپای تورکیا کردوون و فەرماندەیەک و سێ سەربازی تورکیا کوژراون.

 

باکگراوند: ماوەی 46 ساڵە تورکیا و پەکەک لەشەڕدان، بەپێی ئامارێکی وەزارەتی بەرگریی تورکیا، لە ماوەی هەفتەیەکدا 40 گەریلای پەکەکە کوژراون، بەمەش ژمارەی کوژراوانی پەکەکە لە سەرەتای ئەمساڵەوە گەیشتووەتە هەزار و 868 گەریلا، بەڵام پەکەکە ئەم ژمارەیەی پشتڕاست نەکردووەتەوە.