بڕیارێک لە بەرژەوەندیی جووتیارانی هەرێمی کوردستان دەرکرا

ئاڤا نیوز

 

لەسەر پێداگریی هەرێمی کوردستان، حکومەتی عێراق هاوردەکردنی پێنج بەرهەمی کشتوکاڵیی وەرزی لە دەروازە سنوورییەکانی قەدەغە دەکات، ئەمەش لەپێناو ساغبوونەوەی بەرهەمی نێوخۆی جووتیارانی هەرێمی کوردستان.

وێنە گەورەکە: لە نێوان وەزارەتەکانی کشتوکاڵی  هەرێمی کوردستان و عێراق، ڕۆژمێری هاوبەش و پەسندکراوی کشتوکاڵی هەیە، بەپێی ڕۆژمێرەکە لەکاتی پێگەیشتنی هەر بەرهەمێک، هاوردەکردنی بەرهەمەکە لە دەروازە سنوورییەکان قەدەغە دەکرێت، بەڵام ئەمساڵ عێراق پابەندی ڕێککەوتنەکە نەبووە و 20 بەرهەم کە پێویست بوو قەدەغە بکرێن، لە ئێران هاوردەکراون. 

ڕاگەیێنراوی فەرمی: وەزارەتی کشتوکاڵ و سەرچاوەکانی ئاوی هەرێمی کوردستان ڕایگەیاند: "ئەنجوومەنی ئابووریی عێراق لەسەر داواکاری و پێداگریی ئێمە، هاوردەکردنی هەریەک لە بەرهەمەکانی (خەیار، تەماتە، پیاز، کولەکە و شووتی ) قەدەغە کرد، کە پێچەوانەی ڕۆژمێری کشتوکاڵی پەسەندکراوبوو لەنێوان هەردوولا، بەهۆی مەراسیمەکانی عاشوورا لەلایەن حکومەتی عێراق قەدەغەکە هەڵگیرابوو".

بۆچی گرنگە: دەروازە سنوورییەکانی عێراق بەڕووی ئەم بەرهەمانە دادەخرێن، ئەمەش دەرفەتێکی گرنگە بۆ ساغکردنەوەی بەرهەمی جووتیارانی هەرێمی کوردستان، بەتایبەتی جووتیارانی ناوچەی پێنجوێن، سیدەکان و  دەشتەکانی هەولێر و دهۆک کە ئێستا بەرهەمەکانیان پێگەیشتووە و کێشەی بەبازاڕکردنیان هەیە، لەمەودوا کێشەکە چارەسەر دەبێت و بەرهەمەکانیان هەناردەی بازاڕەکانی ناوەڕاست و خوارووی عێراق دەکرێن.