دەستەی مافی مرۆڤ: ڕادەستكردنەوەی بەهزاد خوسرەوی بە ئێران پێچەوانەی دەستووری عێراقە

ئاڤا نیوز

 

دەستەی سەربەخۆی مافی مرۆڤ ڕایگەیاند، ڕادەستکردنەوەی بەهزاد خوسرەوی پێچەوانەی دەستووری عێراقە و کە دەڵێت، نابێ پەنابەری سیاسی ڕادەستی وڵاتی خۆی بکرێتەوە. 

 

ڕاگەیێنراوی فەرمی: دوای بانگکردن لە چەند ڕۆژی ڕابردوو بەهزاد خوسرەوی لەلایەن دەزگاکانی ئاسایشی سنووری شاری سلێمانی ڕەوانەی وڵاتی ئێران کراوەتەوە دوور لە هەر ڕێكارێکی كارگێڕی و یاسایی و بێ هەبوونی هیچ بڕیار و ڕێکكەوتنێک لەمبارەیەوە. 

 

زانیاریی زیاتر: دەستەی سەربەخۆی مافی مرۆڤ ڕاشیگەیاند: ناردنەوەی ئەو هاووڵاتیە بە وڵاتی خۆی پێچەوانەی بڕگەی دووەمی ماددەی (21)ـی دەستووری عێڕاقی فیدراڵە کە دەڵێت (نابێ پەنابەری سیاسی ڕادەستی وڵاتی خۆی بکرێتەوە یان بگەڕێنرێتەوە بەزۆری بۆ ئەو وڵات و شوێنەی لێی ڕاکردووە) هاوكات پێچەوانەی بنەماکانی مافی پەنابەرێتی و ڕێککەوتننامە نێودەوڵەتیەکانی تایبەت بە مامەڵەکردنە لەگەڵ پەنابەران.

 

قووڵتر: ئەگەر هەر جۆرە ئاڵوگۆڕێک هەبێ بۆ گەڕانەوەی هەر پەنابەرێک بۆ وڵاتی خۆی لەنێوان وڵاتان پێویستە لەژێر چاودێریی نێودەوڵەتی و نەتەوە یەکگرتووەکان بێت و بە ئاگاداری لایەنی پەیوەندیداری ناوخۆی هەرێمی کوردستان بێت و بەپێی یاسا کارپێکراوەکان مامەڵە لەگەڵ ئەم جۆرە کەیسانە بکرێن.

 

ئەوەی پێویستە بیزانیت: دەستەی سەربەخۆی مافی مرۆڤ لە ڕاگەیێنراوەكە داوا دەكات نەتەوە یەکگرتووەکان بێتە سەر هێڵ بۆ سۆراغکردنی هەواڵی بێهزاد خوسرەوی و پاراستنی ژیانی لە وڵاتی خۆی.