پێشەوا هەورامانی: بەپێی ڕێككەوتنی هەولێر و بەغدا كێشەی مووچە چارەسەر كرا

ئاڤا نیوز 

 

گوتەبێژی حكومەتی هەرێمی كوردستان ناوەڕۆک و ئەنجامی كۆبوونەوەكانی نێوان شاندی باڵای هەرێمی كوردستان و عێراق لە شاری هەولێر ئاشكرا دەكات.

 

وێنە گەورەکە: ڕۆژانی یەکشەممە و دووشەممە، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو، بەپێی بەدواداچوونی ئاڤا نیوز، ئەنجامی كۆبوونەوەكان دڵخۆشكەرن بۆ خەڵكی هەرێمی كوردستان.

لێدوانی تایبەت: پێشەوا هەورامانی، گوتەبێژی حکومەتی هەرێمی کوردستان، بە کوردستان حەسەن، پەیامنێری دبلۆماسی ئاڤا نیوزی ڕاگەیاند: لە كۆبوونەوەكانی هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان، زۆر بابەت گفتوگۆی جددیان لەسەر كرا، سەرۆكوەزیران بارزانی لە خاڵ بە خاڵی گفتوگۆكاندا قسەی هەبوو و دەچووە نێو وردەكارییەوە، بەرگرییەكی زۆر توندی لە مافی خەڵكی هەرێمی كوردستان كرد.

 

زانیاریی زیاتر: سەبارەت بە پرسی مووچە پێشەوا هەورامانی ڕایگەیاند: ناوەڕۆكی ڕێككەوتنی نێوان ئەنجوومەنی وەزاریی ئابووریی هەرێمی كوردستان و بەغدا دەچێتە ئەنجوومەنی وەزیرانی عێراق و لەوێ بڕیاری لەسەر دەدرێت و بەپێی ڕێككەوتنەكە بێت، كێشەی مووچەی مووچەخۆرانی هەرێمی كوردستان چارەسەر كرا.

 

لەلایەكی دیكەوە: سەبارەت بە پرسی نەوت گوتەبێژی حكومەتی هەرێمی كوردستان ڕایگەیاند: بابەتی نەوت یەكێكی دیكە لە بابەتە سەرەكییەكانی گفتوگۆكان بوو، سەرۆكوەزیران بارزانی پەیامی ئەوە بوو كە حكومەتی هەرێمی كوردستان هیچ كات بەربەست نییە لەم بابەتە و ڕاگرتنی هەناردەكردنی نەوتی هەرێمی كوردستان، زیانی گەورەی بە ئابووریی عێراق گەیاندووە، بۆ ئەمەش پێشنیار كرا كە لەنێوان وەزارەتەكانی سامانە سرووشتییەكانی هەرێمی كوردستان و وەزارەتی نەوتی عێراق كۆبوونەوە بكرێت بۆ ئەوەی بەدوای ڕێككەوتنێكی خێرا بگەڕێن و هەناردەكردنەوەی نەوتی هەرێمی كوردستان دەستپێبكاتەوە.