"سەردانەكەی سەرۆک بارزانی بۆ بەغدا كاریگەریی لەسەر ڕێككەوتنەكەی ئەمڕۆ هەبوو"

ئاڤا نیوز 

 

هەولێر و بەغدا لەسەر زۆرێک لە پرسە هەڵپەسێردراوەکانی نێوانیان ڕێككەوتن و وەزیری دەرەوەی عێراقیش باسی كاریگەریی دوایین سەردانی سەرۆك بارزانی بۆ بەغدا دەكات.

 

وێنە گەورەکە: ڕۆژانی یەکشەممە و دووشەممە، بە سەرپەرشتیی ڕاستەوخۆی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو، بەپێی بەدواداچوونی ئاڤا نیوز، ئەنجامی كۆبوونەوەكان دڵخۆشكەرن بۆ خەڵكی هەرێمی كوردستان، لەمیانەدا شاندە باڵاكەی عێراق لەگەڵ سەرۆك بارزانیش كۆبوونەوە.

 

چیرۆكی سەرەكی: ڕۆژی چوارشەممە 3-7-2024 سەرۆک بارزانی، بە یاوەریی شاندێکی باڵای هەرێمی کوردستان سه‌ردانی به‌غدای كرد و زیاتر لە 17 دیدار و کۆبوونەوەی لەگەڵ سەرکردەی لایەنە سیاسییەکان، بەرپرسانی حزبی و حکومی و باڵیۆزانی وڵاتان لە عێراق کرد.

 

زانیاریی زیاتر: ئامانجی سەردانەكەی سەرۆک بارزانی بریتی بوو لە چارەکردنی کێشە ناوخۆییەکانی عێراق بە گشتی و کێشەکانی نێوان هەولێر و بەغدا بە تایبەتی، لەمیانەدا ڕایگەیاند "ئەگەر نیازی باش هەبن، چارەکردنی هیچ کێشەیەک زەحمەت نابێت".

لێدوانی فەرمی: فوئاد حوسێن، وەزیری دەرەوەی عێراق، بە كوردستان حەسەن، پەیامنێری دیپلۆماسیی ئاڤای ڕاگەیاند: بەدڵنیاییەوە سەردانی ئەم دواییەی سەرۆک بارزانی بۆ بەغدا کاریگەریی لەسەر ڕێككەوتنەكەی ئەمڕۆی ئەنجوومەنی وەزاریی ئابووریی هەرێمی كوردستان و عێراق هەبووە.