بەپێی توێژینەوەیەک سوودانی لە هەڵبژاردنی داهاتوو 60 کورسی دەهێنێت

ئاڤا دیجیتاڵ

بەپێی توێژینەوەیەک کە چوارچێوەی هەماهەنگی كردوویەتی، محەممەد شیاع سوودانی، سەرۆكوەزیرانی عێراق لەهەڵبژاردنی داهاتووی پەرلەمانی عێراقدا نزیکەی 60 کورسی بەدەستدەهێنێت.

زانیارییە بەدەستهاتووەکان: سێ سەرچاوەی چوارچێوەی هەماهەنگی بە رۆژنامەی شەرقولئەوسەتیان راگەیاندووە، بەپێی ئەو توێژینەوەیە لایەنە شیعییەکان  لەهەڵبژاردنی پەرلەمان کە بڕیارە ساڵی 2025 بەڕێوەبچێت،  هەمان ئەنجامی هەڵبژاردنی ئەنجوومەنی پارێزگاکان بەدەست دەهێننەوە کە لە تشرینی یەکەمی 2023 بەڕێوەچوو، محەمەد شیاع سوودانیش هەرچەند بەشداری لەهەڵبژاردنە خۆجێیەکان نەکرد نزیکەی 60 کورسی بەدەستدەهێنێت.

ئەوەی لەوبارەیەوە دەگوترێت: بەگوتەی یەکێک لە سەرچاوەکان، سوودانی لە ماوەی سێ مانگی ڕابردوو هاوپەیمانی کردووە لەگەڵ هەندێک لایەنی شیعە،  سێ پارێزگاری ئێستا کە لەهەڵبژاردنی ئەنجوومەنی پارێزگاکان سەرکەوتووبوون لە چوارچێوەی هەماهەنگی نەماون و چوونەتە ناو هاوپەیمانییە شاراوەکەی سوودانییەوە.

ڕێککەوتنەکە بەمشێوەیەیە: هاوپەیمانییەکەی سوودانی، پێکدێن لە هەندێک لە چالاکوانی تشرینییەکان، هەندێک حزبی نزیک لە ئێران کە لە هەڵبژاردنی ئەنجوومەنی پارێزگاکان سەرکەوتنیان بەدەستهێنا، لەگەڵ هەندێک لایەن کە لەپەرلەمان نوێنەریان نییەو ئێستا دەرکەوتوون. 

ئەوەی پێشبینی دەکرێت: بەپێی توێژینەوەکە، سوودانی لەهەڵبژاردنەکانی داهاتووی پەرلەمانی عێراق تەنیا خۆی 10 کورسی بەدەستدەهێنێت، پێشبینیش دەکرێت هاوپەیمانیەکەی 60 کورسی بەدەستبهێنێت کە دەکاتە زیاتر لە سێ یەکی کورسی لایەنە شیعییەکان کە  چوارچێوەی هەماهەنگی مەزندەی دەکات 180 کورسی بێت.