لە مۆسكۆ خۆپیشاندەران گومانی خۆیان لە مردنی ناڤالنی دەردەبڕن

ئاڤا نیوز

گەنجان لە شەقامەکانی مۆسکۆ خۆپیشاندانیان ساز کرد، ترس و بەدگومانیی خۆیان لە هەواڵی مەرگی ئەلێکسی ناڤالنی، کەسایەتی ئۆپۆزسیۆن دەربڕی.

چیرۆکی سەرەکی: دوای ڕاگەیاندنی مەرگی ناڤالنی، ژمارەیەک قوتابی و گەنج و خەمخۆرانی مافی مرۆڤ و ئۆپۆزسیۆنی حکومەتەکەی پووتین لە مۆسکۆ خۆپیشاندانیان ساز کرد و بێباوەڕیی خۆیان بەرامبەر جۆری مەرگە ڕاگەیەنراوەکەی ناڤالنی دەربڕی.

ئەوەی پێویستە بیزانیت: دەزگای هەواڵی ڕووسیا ڕایگەیاندووە ڕۆژی پێنجشەممە ناڤالنی بە ڤیدیۆ لێدوانیداوە، هیچ نیشانەیەکی نەخۆشیی پێوە دیار نەبووە و باسی ناتەندروستیی خۆی نەکردووە.

دمیتری موراتۆڤ، کە براوەی خەڵاتی نۆبڵە، مردنەکەی ناڤالنی بە "کوشتن" پەسن کرد و گوتی "ناڤالنی ساڵانێکە ئەشکەنجە دەدرێت".

باکگراوند: ناڤالنی ساڵانێک بوو سەرسەختترین ڕەخنەگری پووتین بوو. وێڕای یاسای تووندیش لە دژی خۆپیشاندان، بەڵام ئەو دەیتوانی خۆپیشاندانی گەورە لە دژی حکومەت ڕێکبخات. لە سەرەتای ساڵی 2021دا دوای ئەوەی لە ئەڵمانیاوە گەڕایەوە بۆ ڕووسیا، خرایە نێو بەندیخانە و بە 19 ساڵ زیندانیکردن حوکم درا.