لە هەولێر 153 فرۆشگە و شوێنی بازرگانی سزا دەدرێن

ئاڤا نیوز

 

بەهۆی سەرپێچی و پابەندنەبوون بە ڕێنماییەكان، لەماوەی مانگێكدا 153 فرۆشگە و شوێنی بازرگانیی و كۆگا لە هەولێر سزا دراون.

 

لێدوانی فەرمی: هۆگر عەلی، بەڕێوەبەری چاودێریی بازرگانیی هەولێر بە ڕزگار كۆچەر، پەیامنێری ئاڤای ڕاگەیاند: لیژنە و تیمەكانی بەڕێوەبەرایەتییەكەمان لە مانگی ڕابردوو 1535 شوێنی بازرگانیان لە نموونەی (كۆمپانیا، كۆگا، ئارایشتگە، سەمونخانە، نانەواخانە، گۆشتفرۆش، سەوزەفرۆش، ماركێت) بەسەر كردووەتەوە و ئەوانەی پابەندی ڕێنماییە تەندروستی و كارگێڕییەكان نەبوون، سزا دراون.

 

زانیاریی زیاتر: لەو ماوەیەدا بەڕێوەبەرایەتییەكە زیاتر لە 28 ملیۆن دینار سزای سەرپێچیكارانی داوە، كۆی ئەو شوێنانەی كە لە مانگی ڕابردوو لە سنووری هەولێر سزای دارایی و كارگێڕی دراون 153 شوێنە.

 

ئەوەش بزانە: هۆگر عەلی ئاماژەی بە ئەوەش دا كە بەڕێوەبەرایەتییەكە چاودێریی وردی گۆشتفرۆشەكان دەكات و لە مانگی ئابدا 23 گۆشتفرۆش سزا دراون.