جێگری والی داعش لە عێراق کوژرا

ئاڤا نیوز 

 

ناو و بەرپرسیاریێتی ئەو سەرکردانەی داعش و وردەکاری ئەو ئۆپەراسیۆنە ئاشکرا دەکرێت کە بەر لە 15 ڕۆژ لە بیابانەکانی ئەنبار بە هاوبەشی لە نێوان هێزە ئەمنییەکانی عێراق و هێزەکانی ئەمریکا کرا و بەهۆیەوە 14 چەکداری داعش کوژران و  7 سەربازیی ئەمریکیش برینداربوون، کە یەکێکیان جێگری والی داعش بوو لە عێراق. 

 

 

وێنە گەورەکە: فەرماندەیی ئۆپەراسیۆنە هاوبەشەکانی عێراق بە هاوبەشی لەگەڵ هێزەکانی ئەمریکا بەرەبەیانی ڕۆژی 29ـی ئاب ئۆپەراسیۆنێکیان کردە سەر مۆڵگەی چەکدارانی داعش لە ناوچەی حوزەیمی لە ڕۆژهەڵاتی دۆڵی غەدەف لە بیابانەکانی پارێزگای ئەنبار.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکان ڕایگەیاند: ئۆپەراسیۆنەکە ئەنجامی گرنگی لێکەوتەوە، زۆربەی سەرکردەکانی چەتەکانی تیرۆریستی هێڵی یەکەمی داعش کوژراون.

 

زانیاریی زیاتر: پاش ئەنجامدانی پشکنینی دی ئێن ئەی بۆ تەرمی (14) کوژراوەکەی داعش، ناسنامەکەیان ئاشکرا کرا و دەرکەوت کە چەندین سەرکردەی ڕێکخراوەکەی تێدایە، لەوانە: جێگری والی داعش لە عێراق و والی ئەنبار و والی باشوور و ژمارەیەک بەرپرسی دیکەی ڕێکخراوەکە.

 

ناوی سەرکردە کوژراوەکانی داعش:

1. ئەبو سدیق، یاخود ئەبو موسلیم. ناوە ڕاستەقینەکەی ئەحمەد حامد حوسێن عەبدولجەلیل و پۆستەکەی جێگری والی لە عێراق.

2. مەنسوور، ئەبوو عەلی توونسی. ناوە ڕاستەقینەکەی عومەر بن سویح بن سالم، پۆستەکەی ئەمیری پیشەسازی و گەشەپێدان و دۆسیەی کیمیایی بووە.

3. ئەبوو هومام، ناوە ڕاستەقینەکەی سەعد محەممەد ناسر، پۆستەکەی والی ئەنبار.

4. شاکر هەرات نەجدی، بەرپرسی سەربازیی داعش لە ئەنبار.

5. ئەبوو عەبد حنوب، یاخود ئەبوو عەبدولڕەحمان، ناوە ڕاستەقینەکەی موعەمەر مەهدی خەلەف حوسێن، پۆستەکەی والی باشوور.

6. وەقاس، ناوە ڕاستەقینەکەی عەلی ڕەباح رەجا، ئەفسەری پەیوەندییەکان و بەرپرسی دۆسیەی ئابووری و سەرمایەی ویلایەتی ئەنبار.