پووتین: ناتۆ دەبێتە بەشێک لە جەنگ

ئاڤا نیوز

 

دوای داواکاریی ئۆکراینا بۆ بەکارهێنانی مووشەکی دوورهاوێژی بەریتانیا و ئەمریکا، ڕووسیا هەڕەشە لە ناتۆ دەکات و باسی هێزی ئەتۆمیی خۆی دەکات. 

 

وێنە گەورەکە: دوای ناردنی ژمارەیەکی زۆری مووشەکی بالیستیک لەلایەن ئێرانەوە بۆ ڕووسیا، ئۆکراینا داوا لە ناتۆ دەکات ڕێگەی پێبدەن مووشەکی دوورهاوێژی ئەوان بەکاربهێنێت.

ڕاگەیێندروای فەرمی: ڤلادیمێر پووتین، سەرۆکی ڕووسیا دەڵێت: "ئەگەر ئەم بڕیارە بدرێت، مانایەکەی کەمتر نابێت لە بەشداری ڕاستەوخۆی وڵاتانی ناتۆ و ئەمریکا و وڵاتانی ئەوروپا لە شەڕی ئۆکرانیادا، بیرتان نەچێت ڕووسیا خاوەنی چەکی ئەتۆمییە و بیر لە دەرەنجامەکان بکەنەوە". 

 

زانیاریی زیاتر: ئەمریکا و بەریتانیا لە گفتوگۆدان بۆ بڕیاردان لەسەر ئەوەی ڕێگە بە ئۆکراینا بدەن لە وڵاتی خۆیەوە بە مووشەکی دوورهاوێژ هێرش بکاتە سەر ڕووسیا.  

 

ئەمەش بزانە: زیاتر لە دوو ساڵ و نیوە جەنگی ئۆکراینا و ڕووسیا دەستیپێکردووە، هەرچەندە هەر لە سەرەتای جەنگەکەوە ئۆکراینا لە هێڵی بەرگریدا بوو، بەڵام لە دوو مانگی ڕابردوودا بەهۆی وەرگرتنی فڕۆکەی ئێف 16 و تانکی گوللەنەبڕ لەلایەن وڵاتانی ئەوروپا، ئاراستەی شەڕەکەی گۆڕی و دەستی بە هێرشبردن کرد.

تاوەکو ئێستا ئۆکراینا ڕووبەرێکی زۆر لە هەرێمی کورسکی ڕووسیا داگیر کردووە، ئێستاش ڕووسیا ترسی هەیە بە بەکارهێنانی مووشەکی دوورهاوێژ بالادەستی ئۆکراینا لە جەنگەکەدا زیاتر بێت.