سوید دەیەوێت کۆچبەران بە پارە ڕازی بکات

ئاڤا نیوز 

 

لە چوارچێوەی هەوڵەکانی سوید بۆ ناردنەوەی کۆچبەران، وڵاتەکە بڕی 34،000 دۆلار دەدات بە هەر کۆچبەرێک کە بگەڕێتەوە بۆ وڵاتەکەی.

 

وێنە گەورەکە: سوید، ئەو وڵاتەی ساڵانێکە بووەتە پەناگەیەکی ئارام بۆ کۆچبەران، ڕۆژی پێنجشەممە ڕایگەیاند، پلانی هەیە ڕێژەی ئەو بڕە پارەیە زیاد بکات کە دەیدات بەو پەنابەرانەی دەیانەوێت بگەڕێنەوە بۆ نیشتمانی خۆیان.

 

ڕاگەیێنراوی فەرمی: جۆهان فۆرسێل، وەزیری کۆچبەرانی سوید لە کۆنگرەیەکی ڕۆژنامەوانیدا ڕایگەیاند: ئەو کۆچبەرانەی دەگەڕێنەوە وڵاتەکانیان، دەتوانن سوودمەندبن لە وەرگرتنی 350 هەزار کرۆنی سویدی کە دەکاتە 34 هەزار دۆلاری ئەمریکی. 

 

زانیاریی زیاتر: لە ساڵی ڕابردوودا تەنها یەک کۆچبەر بە بڕیارەکەی سوید ڕازی بووە و گەڕاوەتەوە وڵاتەکەی خۆی.

 

ئەوەی پێویستە بیزانیت: ئێستا وڵاتەکە 10 هەزار کرۆن بە هەر پێگەیشتوویەک، پێنج هەزار کرۆن بۆ هەر منداڵێک و 40 هەزار کرۆنیش دەدات بە هەر خێزانێک، پێشبینی دەکرێت ئەو هاندانە ببێتە جێگەی سەرنجی سەدان کەس لە سوید کە داهاتی مانگانەیان کەمە یاخود بەشی بژێوییان ناکات.