سەرۆکی ئۆپۆزسیۆنی ڤەنزوێلا داوای خۆپیشاندانی نوێ لە دژی مادۆرۆ دەکات

ئاڤا نیوز

 

ماریا کۆرینا ماچادۆ، سەرۆکی ئۆپۆزسیۆنی ڤەنزوێلا داوا دەکات ڕۆژی 28ـی ئەیلوول جارێکی دیکە دەست بەخۆپیشاندان بکرێتەوە، ئەمەش وەک ڕەتکردنەوەی دووبارە هەڵبژاردنەوەی نیکۆلاس مادۆرۆ بۆ خولی سێیەمی سەرۆککۆماری ڤەنزوێلا.

 

بڵاوکراوەی فەرمی: ماریا کۆرینا ماچادۆ، سەرۆکی ئۆپۆزسیۆنی ڤەنزوێلا لە پۆستێکیدا لە سۆشیاڵمیدیا نووسیویەتی: "28ـی ئەیلول دەنگمان بەرز دەکەینەوە تاوەکو جیهان ئێدمۆندۆ گۆنزالێز وەک سەرۆکی ڤەنزوێلا دەناسێت و مادۆرۆ تێدەگات کە نەماوە".

 

وێنە گەورەکە: ئۆپۆزسیۆن بانگەشەی ئەوە دەکات، گۆنزالێز ئوروتیا براوەی هەڵبژاردنی سەرۆکایەتییە و  زیاتر لە 60%ـی دەنگەکانی بەدەستهێناوە.بەڵام ئەنجوومەنی نیشتمانیی هەڵبژاردنەکان بە 52%ـی دەنگەکان مادۆرۆی بە براوە ناساند و دادگای باڵا سەرکەوتنەکەی پەسەند کرد.

 

چی ڕوویدا؟ ئێدمۆندۆ گۆنزالێز ئوروتیا، کە لە وڵاتەکەیدا هەڕەشەی زیندانیکردنی لەسەربوو، ناچار بوو بەرەو ئیسپانیا هەڵبێت و ئەو وڵاتەش ڕەزامەندی دا مافی پەنابەری پێبدات.

 

لەلایەکی دیکەوە: وڵاتانی یەکێتی ئەوروپا تائێستا ڕەتیانکردووەتەوە دان بە سەرکەوتنەکەی مادۆرۆدا بنێن و واشنتۆنیش دانی بە گۆنزالێز ئۆروتیا وەک سەرۆک کۆماردا ناوە .

 

کاریگەری و لێکەوتەکانی: ڕۆژی پێنجشەممەی ڕابردوو، ویلایەتە یەکگرتووەکانی ئەمریکا سزای بەسەر 16 کەسی نزیک لە مادۆرۆ بە تۆمەتی" کێشە نانەوە" لە هەڵبژاردنەکانی سەرۆکایەتیی سەپاند.

 

باکگراوند: بەهۆی خۆپیشاندانەکانی لایەنە ئۆپۆزسیۆنەکان دوای ڕاگەیاندنی دووبارە هەڵبژاردنەوەی مادۆرۆ، 27 کەس کوژران و 192 کەس برینداربوون.  نزیکەی دوو هەزار و 400 کەس دەستگیرکران، ئەمە بەپێی سەرچاوە فەرمییەکان.