ناتۆ: پێویستە ئەمریکا خاوەنی بەڵێنی خۆی بێت

ئاڤا نیوز 

ئەمینداری گشتیی ناتۆ دووپاتیکردەوە کە پێویستە بەپەلە ئەمریکا بڕیار لەسەر ناردنی پاکێجێکی هاوکاری بۆ ئۆکراینا بدات، چونکە پێویستیان بەو پشتگیرییەیە بۆ ڕووبەڕووبوونەوەی ڕووسیا.

 

وێنە گەورەکە: ئەمریکا بەڵێنی دابوو هاوکاریی سەربازی بەبڕی 60 ملیار دۆلار بۆ ئۆکراینا بنێرێت، بەڵام لە کۆنگرێس ڕێگری لێکرا، بۆیە ئەمینداری گشتی ناتۆ دەڵێت، پێویستە ئەمریکا بەڵێنەکانی بهێنێتە جێ.

 

لێدوانی فەرمی: جێنس ستۆڵتنبێرگ، ئەمینداری گشتیی ناتۆ لە کۆنفرانسی میونشن ڕایگەیاند، "ئەمریکا دەبێت ئەو بەڵێنەی بە ئۆکرینای دابوو بیگەیەنێتە جێ و 60 ملیار دۆلارەکە بنێرێت".

 

ئەوەی ئێستا ڕوودەدات: پێویستییەکی زۆر گرنگ و بەپەلە هەبوو بۆ ئەوەی ئەمریکا بڕیار لەسەر ناردنی پاکێجێکی هاوکاری بۆ ئۆکراینا بدات، ئەویش ڕووبەڕووبوونەوەی ڕووسیایە لە شاری ئەڤدیڤکا کە سەرچاوەکان دەڵێن، بەهۆی نەبوونی هێز و چەکی پێویست، ئۆکراینا لەو ناوچەیە دەکشێتەوە.