لە بازاری هەولێر ئەمساڵ سێ هێندەی پار زبڵ کۆکراوەتەوە

ئاڤا نیوز 

دوای کۆتاییهاتنی چالاکییەکانی یادی لەدایکبوونی پێغەمبەر (د.خ)، تیمەکانی خزمەتگوزرای ژینگەپارێزی هەولێر تەنیا دوێنێ لە سەنتەری شاری هەولێر، 60 تۆن زبڵ و پاشماوە کۆکراوەتەوە.

 

وێنە گەورەکە: ساڵانە لەیادی لەدایکبوونی پێغەمبەر محەممەد (د.خ)، لە سەنتەری شاری هەولێر چالاکی جۆراوجۆر ئەنجام دەدرێت، هەزاران کەس کۆدەبنەوە، خواردن و شیرینی و ئاو دابەش دەکرێت. 

 

لێدوانی فەرمی: ژیار جەلال، بەڕێوەبەری خزمەتگوزاری ژینگەپارێزی هەولێر بە ئاڤا نیوزی ڕاگەیاند، تا کاتژمێر 7ی بەیانی سەرجەم بازاڕی هەولێر شۆردرا و ئامادەکرا، چالاکیەکان تا کاتژمێر شەشی ئێوارە بەردەوام بوون، دوای تەواو بوونی چالاکییەکە، 30 کارمەندی شارەوانی دوای پێنج کاتژمێر ئینجا توانیان سەرجەم بازاڕی هەولێر پاک بکەنەوە، ئەمساڵ ڕێژەی ئەو زبڵەی کۆکراوەتەوە سێ هێندەی ساڵی پارە.

 

بەگوتەی ژیار جەلال ئەمساڵ بەراورد بە ساڵانی ڕابردوو، ژمارەیەکی زۆرتری خەڵک بەشداری چالاکییەکانی یادی لەدایکبوونی پێغەمبەر (د.خ) کردبوو، ساڵی پار لەو ڕۆژە لەناو بازاڕ تەنیا 24 تۆن زبڵ و پاشماوە کۆکرابوەوە.