سەرۆکوەزیران مەسرور بارزانی بەردی بناغەی بەنداوی دووین دادەنێت

ئاڤا نیوز

 

بەردی بناغەی بەنداوی دووین دادەنرێت و حکومەتی هەرێمی کوردستانیش پلانی ستراتیژی لە گڵدانەوەی ئاو گرتووەتە بەر، ئامادەکاری بۆ کاریگەریی لێکەوتەکانی وشکەساڵی و گۆڕانی کەشوهەوا دەکات.

 

وێنە گەورەكە: یەكێک لە کارنامەکانی كابینەی نۆیەمی حكومەتی هەرێمی كوردستان گرنگیدانە بە كەرتی كشتوكاڵ و سەرچاوەكانی ئاو، لەم چوارچێوەیەدا لە ماوەی پێنج ساڵی ڕابردوودا دەیان بەنداو و پۆند دروست كراون.

 

چیرۆکی سەرەکی: بەردی بناغەی بەنداوی دووین لە هەولێر دانرا، توانای گڵدانەوەی 100 ملیۆن مەتر سێجا ئاوی هەیە، بەنداوەکە چوار کیلۆمەتر چوارگۆشەیە و 75 مەتر بەرزە.

 

لێدوانی فەرمی: سەرۆکوەزیران مەسرور بارزانی ڕایگەیاند: "لەم پێگە مێژووییە، بەردی بناغەی بەنداوی دووین دادەنێین و  بەجۆرێک دیزاینکراوە، کاریگەریی لەسەر شوێنەوارە مێژوویەکانی ناوچەکە نەبێت، هاوکات داوام کردووە ئاوەڕۆکانی شەقڵاوە نەخرێنە سەر بەنداوەکە و پاڵاوتنیان بۆ بکرێت."

 

سەرۆکوەزیران مەسرور بارزانی گوتیشی: ئەم شوێنە زۆر گونجاوە بۆ گڵدانەوەی ئاو، سنوورەکە دەوڵەمەندە و بڕیارمان داوە قەرەبووی ئەو جووتیارانە بکەینەوە کە زەوییەکانیان دەکەوێتە ژێر بەنداوەکەوە، ئەم بەنداوە دەڤەرەکە دەکاتە ناوەندێکی گەشتاریی، سرووشتی و شوێنەواری، هاوکات لە بەرزکردنەوەی ئاستی ئاوی ژێر زەوی و سامانی ماسی و کاری کشتوکاڵی کاریگەریی بەرچاوی دەبێت.

 

ئەمەش بزانە: بەنداوەکە بە شێوازی کۆنکریتی  RCC  دروست دەکرێت، لە بەرزترین ئاستیدا 320 مەتر درێژ دەبێت.