سلێمانی دەبێتە شاڕێی گواستنەوەی ماددە هۆشبەرەکان

ئاڤا نیوز

ڕاپۆرتێکی هەواڵگریی عێراق لەبارەی بازرگانیکردن بە ماددە هۆشبەرەکان ئاشکرا دەبێت. ڕاپۆرتەکە لە دەزگای ئاسایشی نیشتمانی عێراق بە ژمارە 149 دزەیکردووە، ورد و درشتی پەیوەستە بە هێڵەکانی بازرگانی ماددەی هۆشبەر لە عێراق و شاری سلێمانی، وێنەیەکیشی بۆ محەممەد شیاع سوودانی، سەرۆکوەزیرانی عێراق نێردراوە.

وێنە گەورەکە: وەک لە ڕاپۆرتەکەدا ئاماژەی پێکراوە، چەند بازرگانێکی ماددەی هۆشبەر لە وڵاتەکانی وەک ئۆزبەکستان و ئەفغانستان و ئێران ماددەی هۆشبەر دەکڕن و بەڕێگای شاری بانەی ڕۆژهەڵاتی کوردستان دەیبەن بۆ قەڵادزێ، دواتر بە شاری سلێمانی تێپەڕ دەکرێت تا دەگاتە کفری، پاشان دەگەیێنرێتە شارەکانی وەک بەغدا و ئەنبار.

ئەوەی پێویستە بیزانیت: تا ساڵی 2019 هێشتا بازرگانان ئەم ناوچەیان نەخستبووە سەر نەخشەی تێپەڕینی ماددەی هۆشبەر، بەڵام هێزەکانی ئاسایشی هەرێمی کوردستان بە تەنیا لەو هێڵەی لە ڕاپۆرتە هەواڵگرییەکەی عێراق ئاماژی بۆ کراوە، 94 قاچاخچییان دەستگیرکردووە، ئەم ڕێژەیە بەراورد بە ساڵانی ڕابردوو 500% زیادیکردووە.
 
ئەوەی لەبارەیەوە دەگوترێت: هەر ڕاپۆرتە ناوخۆییەکان نین، نەتەوە یەکگرتووەکان ئەمساڵ ڕاپۆرتێکی بڵاوکردووەتەوە، بەگوێرەی ناوەڕۆکەکەی عێراق بووەتە مەڵبەندی بڵاوبوونەوەی ماددەی هۆشبەر لە ناوچەکەدا، بەجۆرێک لە شارەکانی وەک موسەننا و کەرکووک و خورماتوو ماددەی هۆشبەر بەرهەم دەهێنرێن دواتر دەگوازرێنەوە.

لەلایەکی دیکە: ئاژانسی ڕۆیتەرز لە ڕاپۆرتێکی بنکۆڵکاری ئاشکرای دەکات، بازرگانانی ماددەی هۆشبەر بەئاشکرا  لە قەڵادزێ بەرگی حەبە ترامادۆڵەکان لەناو حاویەی زبڵدانەکان فڕێ دەدەن.

ژمارەکان وادەڵێن: بەپێی ڕاپۆرتی بەڕێوەبەرایەتیی نەهێشتنی ماددە هۆشبەرەکانی هەرێمی کوردستان، تەنیا لە حەوت مانگی ئەمساڵدا هەزار و سێ تۆمەتباری ماددەی هۆشبەر دەستگیرکراون، لەو ژمارەیە 474 بەکارهێنەر و 529 بازرگان بوون. 

194 کیلۆ گرام ماددەی هۆشبەر دەستی بەسەردا گیراوە، لەو ژمارەیە 170 کیلۆی ماددەی کریستاڵ بووە.
هاوکات 28 هەزار و 990 شیت حەبی هۆشبەر دەستیان بەسەردا گیراوە.

گۆشەیەکی دیکە: یەکێکی دیکە لە هێڵەکانی ترانزێتی گواستنەوەی ماددە هۆشبەرەکان دەروازەکانی باشماخ و پەروێزخانن، لەوێوە دەهێنرێن بۆ سلێمانی، دواتر تێپەڕ دەکرێن بۆ کەرکوک، دواتر لەوێ بەشێکیان بە خەتی دووز یان مەخمور دەبرێن بۆ مووسڵ و لەوێشەوە بۆ قەزای شەنگال، پاشان بۆ ڕۆژئاوای کوردستان، ئەو هێڵە درێژ دەبێتەوە دەچێتە لوبنان و لەڕێگەی دەریای سپی ناوەڕاست بۆ وڵاتانی جیهان دەگوازرێتەوە.