تەنیا لە ڕۆژێکدا  60 تۆن زبڵ و پاشماوە لە هەولێر کۆدەکرێتەوە

ئاڤا نیوز

دوای کۆتاییهاتنی چالاکییەکانی یادی لەدایکبوونی پێغەمبەر (د.خ)، تیمەکانی خزمەتگوزرای ژینگەپارێزی هەولێر، تەنیا دوێنێ لە سەنتەری شاری هەولێر 60 تۆن زبڵ و پاشماوەیان کۆکردووەتەوە.

وێنە گەورەکە: ساڵانە لەیادی لەدایکبوونی پێغەمبەر محەممەد (د.خ)، لە سەنتەری شاری هەولێر چالاکی جۆراوجۆر ڕێکدەخرێن، هەزاران کەس کۆدەبنەوە، خواردن و شیرینی و ئاو دابەش دەکرێت. 

 

لێدوانی فەرمی: ژیار جەلال، بەڕێوەبەری خزمەتگوزاری ژینگەپارێزی هەولێر بە ئاڤا نیوزی ڕاگەیاند، تا کاتژمێر 7ی بەیانی سەرجەم بازاڕی هەولێر شۆردرا و ئامادەکرا، چالاکییەکان تا کاتژمێر شەشی ئێوارە بەردەوام بوون، دوای تەواو بوونی چالاکییەکە، 30 کارمەندی شارەوانی دوای پێنج کاتژمێر ئینجا توانییان سەرجەم بازاڕی هەولێر پاک بکەنەوە، ئەمساڵ ڕێژەی ئەو زبڵەی کۆکراوەتەوە سێ هێندەی ساڵی پارە.

 

بەگوتەی ژیار جەلال ئەمساڵ بەراورد بە ساڵانی ڕابردوو، ژمارەیەکی زۆرتری خەڵک بەشداری چالاکییەکانی مەولوودیان کردبوو، ساڵی پار لەو ڕۆژەدا لەناو بازاڕ تەنیا 24 تۆن زبڵ و پاشماوە کۆکرابووەوە.