پۆلیسی هەولێر دەستگیركردنی سێ تۆمەتباری ڕاگەیاند

ئاڤا نیوز

 

لە شاری هەولێر سێ كەس بە ناوی ڕێكخراوی خێرخوازی دزی لە ژمارەیەك هاووڵاتی دەكەن و لەلایەن پۆلیسەوە دەستگیر دەكرێن.

 

چیڕۆكی سەرەكی: لە شاری هەولێر، سێ كەس دەچنە ماڵی ژمارەیەك هاووڵاتیی هەژار و کەمدەرامەت و خۆیان وەك دەزگای خێرخوازی دەناسێنن، لە هاووڵاتییەكان دەپرسن ئاخۆ چەند پارەیان لەماڵ هەیە، لە ئەگەری زانینی بوونی هەر بڕە پارەیەك لە ماڵەكە، دەیدزن و پاشان خۆیان دەشارنەوە.

 

لێدوانی فەرمی: نەقیب کارزان ساڵح، گوتەبێژی پۆلیسی هەولێر بە ئاڤا نیوزی ڕاگەیاند: "سێ تۆمەتبارمان بە ناوەكانی (م. م. غ) و (م. ل. ع) و (ع. م. ق) دەستگیر كرد، چەندین هاووڵاتیان بەناوی دەزگای خێرخوازییەوە هەڵخەڵەتاندبوو، پاشان دزییان لێ كردبوون".

 

زانیاریی زیاتر: تۆمەتبارەكان زیاتر كەسانی پیر و بەساڵاچوویان هەڵخەڵەتاندووە و پارەی زۆریان لێ دزیون.

 

ئەوەش بزانە: سێ تۆمەتبارەكە بە چەندین شێواز خۆیان گۆڕیوە و ناسنامەیان ساختە کردووە، بۆ ئەوەی نەناسرێنەوە، بەڵام دواجار لەلایەن پۆلیسەوە ئاشكرا كراون و دەستگیر كراون.