ڕێنمایی نوێ سەبارەت بە دروستكردنی خانوو بەشێوەی دابەش دوو دەردەکرێت

ئاڤا نیوز

 

بەپێی ڕێنمایی تازەی وەزارەتی شارەوانی هەولێر، ڕێپێدانی خانوو بەشێوەی دابەش دوو، هەموو ئەو گەڕەکانە دەگرێتەوە کە ڕێژەی لە 60٪ زەوییەکانیان دابەش دوو کراون و خانوویان لەسەر دروست کراوە، 40% ەکەی دیکەش دەتوانن زەوییەکان دابەش دوو بکەن.

وێنە گەورەكە: دروستكردنی خانوو بەشێوەی دابەش دوو لەو گەڕەكانەی تاوەكو ئێستا ڕێپێدانیان نەبووە، داوكاریی زۆری هاووڵاتیانی لەسەر بوو، بۆیە وەزارەتی شارەوانی ڕێنمایی لەم بارەیەوە دەرکردووە.

 

ڕاگەیێنراوی فەرمی: سەرۆكایەتیی شارەوانیی هەولێر ڕایگەیاند: پێشووتر ڕێپێدانی دروستكردنی خانوو بەشێوەی دابەش دوو بۆ هەموو هاووڵاتییەک ڕێگەپێدراو نەبوو، بەڵام خۆشبەختانە لەپێناو خزمەتکردنی هاووڵاتیان بەگشتی و خەڵکی کەمدەرامەت بەتایبەتی، بەپێی ڕێنمایی نوێ ئێستا ڕێپێدان هەموو ئەو گەڕەکانە دەگرێتەوە کە ڕێژەی لە 60٪ی خانووەکان دابەش دوو کراون.

 

زانیاریی زیاتر: سەرۆکایەتیی شارەوانیی هەولێر، بەمەبەستی ڕێپێدانی دروستکردنی خانوو بەشێوەی دابەش دوو داوا لە هاووڵاتیان دەکات سەردانی بەڕێوەبەرایەتییەکانی سنووری سەرۆکایەتیی شارەوانی هەولێر بکەن بۆ ڕاییکردنی مامەڵەکانیان بەپێی ڕێکار و ڕێنماییە یاساییەکانی وەزارەتی شارەوانی و گەشتوگوزار.

ئەوەی پێویستە بیزانیت: بەپێی ڕێنمایییەکان هاووڵاتی دەتوانێت بە یەک ناو لە وێنەی تۆمار، دوو خانوو بەشێوەی دابەش دوو دروست بکات بەپێی جێبەجێکردنی مەرج و ڕێکكارەکان.

 

ئەمەش بزانە: هەر زەوییەکی 200 مەتری ئەگەر خانووشی لەسەر دروستکرابێت، لەکاتی ڕووخاندن و دروستکردنی خانووی نوێ دەتوانن لەجیاتی خانوویەک دوو خانووی لەسەر دروست بکەن، بەڵام بەو مەرجەی لەو گەڕەکە 60٪ی خانووەکان دابەش دوو کرابن.