پارێزگاری سلێمانی ڕێنمایی نوێ بۆ بانگەشەی هەڵبژاردن بڵاودەکاتەوە

ئاڤا نیوز 

 

پارێزگاری سلێمانی ڕێنمایی نوێی بۆ بانگەشەی هەڵبژاردنی پەرلەمانی کوردستان بڵاودەکاتەوە، بەپێی ڕێنماییە نوێیەکە  کەژاوەی ئۆتۆمبێل کە ئاستەنگ بۆ هاتووچۆ دروست بکات قەدەغەیە.

 

وێنە گەورەکە: ئەگەرچی پێشووتر کۆمسیۆنی باڵای سەربەخۆی هەڵبژاردنەکانی عێراق ڕۆژی 16-9ی بۆ دەستپێکی بانگەشەی هەڵبژاردن دیاریکردبوو، بەڵام بەهۆی دوورخستنەوەی سێ کاندید، ئەو پرۆسەیە دواخرا و هێشتا وادەیەکی نوێ دیاری نەکراوە.

 

لێدوانی فەرمی: د.هەڤاڵ ئەبوبەکر، سەرۆکی لیژنەی ئەمنی پارێزگای سلێمانی بۆ بانگەشەی هەڵبژاردنی پەرلەمانی کوردستان بە ئاڤا نیوزی ڕاگەیاند: ئەو ڕێنماییە پێنج خاڵە لەڕێگەی کۆمسیۆنەوە بۆ هەموو حزبەکان دەنێردرێت، داوا لە هەموو لایەک دەکەین پێیەوە پابەند بن.

 

ئەوەی پێویستە بیزانیت: بەگوێرەی ڕێنماییەکە، پێویستە هەموو کاندید و قەوارە و هاوپەیمانیەتییەک پابەندی ئارامی شار بن، هاوکات هەڵگرتنی چەک و نمایشی سەربازی بۆ بانگەشەی هەڵبژاردن قەدەغەن، دروستکردنی ئاستەنگ لەڕێگەی کەژاوەی دوور و درێژی ئۆتۆمبێل ڕێگەپێدراو نییە، لەگەڵ ئەوەدا داوا دەکرێت هێرش و ڕووبەڕووبونەوە ئەنجام نەدرێت و لە ئەگەری بوونی حاڵەتی لەمجۆرە پەنا بۆ دادگە ببرێت.

باکگراوند: بڕیارە 20-10-2024 هەڵبژاردنی خولی شەشەمی پەرلەمانی کوردستان دەستپێبکات، حزب و هاوپەیمانییەکان کێبڕکێ لەسەر 100 کورسی پەرلەمان دەکەن.