پرسی بەهەمیشەییکردنی فەرمانبەرانی گرێبەست دەبرێتە کۆبوونەوەی ئەنجوومەنی وەزیران

ئاڤا نیوز 

 

سەرچاوەیەکی باڵا لە حکومەتی هەرێمی کوردستان ڕایدەگەیێنێ، بابەتی بەهەمیشەییکردنی فەرمانبەرانی گرێبەست دیراسەی بۆ دەکرێ و بڕیارە لە کۆبوونەوەکانی داهاتووی ئەنجوومەنی وەزیران باس بکرێت.

وێنە گەورەكە: جگە لەو مامۆستا وانەبێژانەی لە چەند ڕۆژی ڕابردوودا بە فەرمانی سەرۆكوەزیران مەسرور بارزانی كرانە گرێبەست، لە هەرێمی كوردستان زیاتر لە 31 هەزار فەرمانبەرانی گرێبەست هەیە و 7%ی كۆی گشتیی مووچەخۆرانی شارستانی پێكدێنن، بەپێی بڕوانامە و جۆری كاركردنیان بڕی مووچەیان دیاریكراوە.

 

زانیاریی تایبەت: ئاڤا زانیویەتی لە داهاتوویەکی نزیکدا ئەو بابەتە دەبرێتە کۆبوونەوەی ئەنجومەنی وەزیران، هەرچەندە بەرپرسانی باڵای حکومەت دەڵێن ئەم پرسە وردبینی و بەدواداچوونی زۆری پێویستە و کاتی دەوێت تاوەکو یەکلایی دەبێتەوە. سەرچاوەکەی ئاڤا دڵنیایی دایە فەرمانبەرانی گرێبەست کە بەهەمیشەییکردنیان کاری لەپێشینەیان دەبێت


ئەوەی پێویستە بیزانیت: هەموو چوارشەممەیەک ئەنجوومەنی وەزیران کۆدەبێتەوە، بەڵام ئاڤا نیوز زانیویەتی سبەی چوارشەممە بەهۆی سەرقاڵییان بە کردنەوەی چەند پرۆژەیەکی ستراتیژی کۆبوونەوەکە ناکرێت و دەکەوێتە هەفتەی داهاتوو.

 

ئەوەش بزانە: بەپێی ڕێنمایی ژمارە 10ـی ساڵی 2019ـی وەزارەتی دارایی و ئابووری، مووچەی فەرمانبەرانی گرێبەست بەمشێوەیە:

- بێ بڕوانامە 250 هەزار دینار.

- بڕوانامەی سەرەتایی 275 هەزار دینار.

- بڕوانامەی ناوەندی 300 هەزار دینار.

- بڕوانامەی ئامادەیی 350 هەزار دینار.

دبیلۆم 400 هەزار دینار.

 شۆفێری ئۆتۆمبێلی بچووك 450 هەزار دینار.

 

زانیاریی زیاتر: مووچەی بێ بڕوانامەكان و شۆفێر و باخەوان و پاسەوان و سەرجەم جۆرەكانی دیکە بەمشێوەیە:

-شۆفێری ئۆتۆمبێلی بچووك 450 هەزار دینارە

- شۆفێری ئۆتۆمبێلی گەورە -  500 هەزار دینار
- شۆفێری ئۆتۆمبێلی قورس - 650 هەزار دینار
- ئیشپێكەری مۆلیدە - ئیشپێكەری مزەخە -  350 هەزار دینار
- ئیشپێكەری كارگە - 500 هەزار دینار
- پاككەرەوەی شارەوانی - 450 هەزار دینار
- باخەوان - 400 هەزار دینار
كارەباچی - 350 هەزار دینار
- پاسەوان - 350 هەزار دینار