زانکۆڵاین دەکەوێتە کار

ئاڤا نیوز

 

نمرەى دەرچووانى پۆلى دوانزەى ئامادەیى ڕادەستى وەزارەتى خوێندنى باڵا کرا و بڕیارە لە چەند ڕۆژی داهاتوو زانکۆلاین بۆ پڕکردنەوەی ناوی قوتابیان لە بەش و زانکۆکان کارا بکرێت.

 

ڕاگەێنراوی فەرمی: وەزارەتی خوێندنی باڵا و توێژینەوەی زانستی، ڕایگەیاند: نمرەى دەرچووانى پۆلى 12ـی ئامادەیی بەهەرسێ بەشى زانستى و وێژەیى و پیشەیى کە ژمارەیان (55720) دەرچووە، لەلایەن وەزارەتى پەروەردەوە ڕادەستى وەزارەتى خوێندنى باڵا و توێژینەوەى زانستى کرا، بەمەبەستى کارکردن لەسەر سیستمى زانکۆلاین بۆ خوێندن لەزانکۆ و پەیمانگەکان.

 

زانیاریی زیاتر: ئامادەکارییەکان دەستیان پێکردووە، لە زووترین کات پرۆسەى پێشکەشکردن بۆ زانکۆکان دەستپێدەکات، وەزارەتى خوێندنى باڵا بۆ ساڵى خوێندنى 2024-2025 لەسەرجەم زانکۆ و پەیمانگە حکومییەکانى هەرێمى کوردستان زۆرترین دەرفەتى خوێندنى گشتى (بەخۆڕایى) بۆ دەرچووانى ئامادەیی دەڕەخسێنێت.

 

ئەوەی پێویستە بیزانیت: دەرچووانى بەشە زانستىیەکان ژمارەیان (41277) دەرچووە، دەرچووانى بەشە وێژەییەکان ژمارەیان (13541) دەرچووە و دەرچووانى بەشە پیشەییەکان ژمارەیان (902) دەرچووە، جگە لە دەرچووانى قوتابخانە نێودەوڵەتییەکان.

 

ئەمەش بزانە: بەپێى ئامارەکانى وەزارەتى پەروەردە ڕێژەى دەرچووانى قۆناغى 12ـی ئامادەیی لەمساڵدا بە بەراورد بە ساڵى ڕابردوو (19) هەزار دەرچوو زیادى کردووە.

 

ئەوەی لەو بارەیەوە دەگوترێت: بەشداربووانى کۆبونەوەکە هەڵسەنگاندێکى ووردیان لەبارەى ڕێژەى دەرچووان و میکانیزمى تەرخانکردنى کورسى خوێندن لەزانکۆ و پەیمانگەکان کرد،  ئەو کەسانەى کە لە پێش ساڵى 2000 وە دەرچوون و ناویان لە ناو سیستمى زانکۆلایندا نیە، پێویستە لە ڕێگەى لینکێکى تایبەتەوە کە وەزارەتى پەروەردە دایدەنێت، سەردانى وەزارەتى پەروەردە بکەن بۆ وەرگرتنى یوزەرنەیم و پاسوۆرد بەمەبەستى پڕکردنەوەى زانکۆلاین.