پەروەردەی عێراق داوای گواستنەوەی ڕاژەی مامۆستایانی ناوچە کوردستانییەکان دەکات

ئاڤا نیوز

 

وەزارەتی پەروەردەی عێراق داوای ڕەزامەندی لە وەزارەتی دارایی عێراق دەکات بۆ گواستنەوەی ڕاژەی ئەو مامۆستایانەی کە مووچەخۆری هەرێمی کوردستانن، بەڵام لەدەرەوەی ئیدارەی هەرێمی کوردستان دەوام دەکەن.

 

وێنە گەورەکە: حکومەتی هەرێمی کوردستان لە ماوەی ڕابردوودا لە ناوچە کوردستانییەکانی دەرەوەی ئیدارەی هەرێمی کوردستان بەمەبەستی خزمەتگەیاندن بە خەڵکی ئەو ناوچانە لە چەندین سێکتەری جیاوازدا خەڵکی دامەزراندووە و خۆشی مووچەی پێداون، بەشێک لەوان مامۆستان و لە خوێندنگە کوردییەکان دەوامیان کردووە.

 

نووسراوی فەرمی: وەزیری پەروەردەی عێڕاق لە نووسراوێکدا کە ئاراستەی نووسینگەی وەزیری دارایی عێراقی کردووە، داوای ڕەزامەندی دەکات بۆ گواستنەوەی ڕاژەی ئەو مامۆستایانەی کە مووچەخۆری هەرێمی کوردستانن بۆسەر میلاکی وەزارەتەکەیان، بەبێ ئەوەی پلەی وەزیفی یان مووچەیان بۆ تەرخان بکات.

 

زانیاریی زیاتر:  لە نووسراوەکەدا ئەوەش هاتووە: ناوبەناو ئەو داواکارییەمان پێشکەش کراوە بۆ گواستنەوەی ڕاژەکانیان لەسەر ڕاژەی هەرێمی کوردستان بۆ سەر میلاکی حکومەتی فیدراڵی-وەزارەتی پەروەردە بە ناونیشانی وەزیفی و زانستی. ئێمەش پێویستیمان بەو ڕاژانە هەیە بەهۆی بوونی بۆشایی وەزیفی لە ئەنجامی خانەنشینبوونی فەرمانبەران.