یارمەتی دارایی بەسەر ڕزگاربووانی دەستی داعش دابەش دەکرێت

ئاڤا نیوز

 

نووسینگەی سەرۆکوەزیران مەسرور بارزانی بۆ جاری دووەم یارمەتی دارایی بەسەر ڕزگاربووانی دەستی داعش دابەش دەکات و هەموو ڕزگاربووان یارمەتییەکیان پێ دەدرێت. 

 

وێنە گەورەکە: ئەمڕۆ 18-09-2024، نووسینگەی سەرۆکوەزیران مەسرور بارزانی، یارمەتی دارایی بەسەر بەشێک لە ڕزگاربووانی دەستی داعش لە کۆمەڵگەی شاریا دابەش کرد، بڕیارە سبەی پێنجشەممەش لە ناحییەی دێرەلووک و قەزای شێخان بەردەوام بێت.

 

لێدوانی فەرمی: ئیمان عەبدوڵڵا، سەرپەرشتیاری پڕۆژەکە، بە ئاڤا نیوزی ڕاگەیاند: یارمەتییەکە بۆ هەموو ڕزگاربووانە، چ ئەوانەی لە عێراقن، چ ئەوانەی لە دەرەوەن، سەرەڕای ئەوەش هەر خێزانێک چەند ئەندامی ڕزگاربووی دەستی داعشی هەبێت، هەموویان یارمەتییەکەیان پێ دەدرێت.

 

زانیاریی زیاتر: ئەو ڕزگاربووانەی لە دەرەوەی عێراقن لینکیان بۆ دروست کراوە، کە فۆرمێکی تێدایە و دەتوانن زانیارییەکانی خۆیانی تێدا بنووسن، دواتر لە ڕێگەی بریکارەکانیانەوە فۆرمەکە ڕادەستی سەرپەرشتیاری پڕۆژەکە دەکەن و یارمەتییەکەیان پێ دەدرێت.

 

قووڵتر: سێ هەزار و 575 ڕزگاربووی دەستی داعش لەم یارمەتییە داراییە سوودمەند دەبن.

 

خاڵی ئەرێنی: ئەو ڕزگاربووانەی لە خوێندن دابڕاون و تەمەنیان هەڵکشاوە، لە ڕێگەی ئەم پڕۆژەیەوە دەتوانن بە خۆڕایی درێژە بەخوێندن لە زانکۆ و پەیمانگاکان بدەن.

 

ئەوەی پێویستە بیزانیت: داوا کراوە سەنتەرێکی چارەسەری دەروونی بۆ ڕزگاربووانی دەستی داعش لە دهۆک بکرێتەوە، تاوەکو بتوانن چارەسەری دەروونی وەربگرن.

 

باکگراوند: تاوەکو ئێستا سێ هەزار 575 کەس لە دەستی داعش ڕزگار کراون، زیاتر لە دوو هەزار و 500 کەس بێ سەروشوێنن.