لە كەركووک بە نایاسایی پارە لە شۆفێری بارهەڵگرەكان وەردەگیرێت

ئاڤا نیوز

 

لەنێو شاری كەركووک، لە چەند شوێنێک بازگەی نایاسایی دانراون و پارە لە شۆفێرانی تانكەر و بارهەڵگر وەردەگیرێت، پارێزگاری كەركووک بەدواداچوونی بۆ دەكات.

 

چیرۆكی سەرەكی: لە سنووری شاری كەركووک، كەسێک لەسەر زەوییەک كە موڵكی وەزارەتی دارایی عێراقە، بینا و بازگە دروست دەكات و بارهەڵگر و تانكەرەكانی سووتەمەنی ناچار دەكات بە شوێنەكە تێپەڕن و سێ تاوەكو پێنج هەزار دینار لە هەر شۆفێرێک وەردەگرێت.

 

لێدوانی فەرمی: ڕێبوار تەها، پارێزگاری كەركووك ڕایگەیاند: سكاڵایەكمان بەدەست گەیشتبوو سەبارەت دانانی بازگەی نایاسایی و وەرگرتنی پارە لە شۆفێری بارهەڵگرەكان، بەزووترین كات ڕێوشوێنی پێویستمان گرتەبەر، ئەمڕۆ سەردانی شوێنی یەكێک لەو بازگە نایاساییانەمان كرد و نابێت شوێنەواری بمێنێت.

 

لەلایەكی دیكەوە: پارێزگاری كەركووک دووپاتی كردەوە بەهیچ شێوەیەک ڕێگە بە زێدەڕۆیی لە شارەكە نادات "هەموو ئەوانەی كە نیازیان هەیە زێدەڕۆیی بكەنە سەر موڵک و ماڵی دەوڵەت با ئیتر بیری لێ نەكەنەوە".