لە کەرکووک ئۆپەراسیۆنێکی ئەمنی دەکرێتە سەر داعش

ئاڤا نیوز

 

فڕۆکە جەنگییەکانی عێراق ئەم بەرەبەیانییە ژمارەیەک مۆڵگەی داعشیان لە باکووری ڕۆژئاوای کەرکووک کردە ئامانج و هاوکات لەگەڵ بۆردوومانەکە ئۆپەراسیۆنێک لەلایەن هێزێکی هاوبەش لە دژە تیرۆر و سوپای عێراق کرایە سەر ناوچەکە.

 

وێنە گەورەکە: جموجۆڵ و چالاکییەکانی داعش لە عێراق و بە دیاریکراویش لەو ناوچانەی بۆشایی ئەمنین لە نێوان هێزەکانی پێشمەرگە و سوپای عێراق بەردەوامە و لە ماوەی ڕابردووشدا چەندین جار زیانیان بە هێزەکانی پێشمەرگە و هێزە ئەمنییەکانی عێراق و هاووڵاتیانی سڤیلی ناوچەکە گەیاندووە.

 

زانیاریی بەدەستهاتوو: سەرچاوەیەکی ئەمنی بە میدیای عێراقی ڕاگەیاند: بەرەبەیانیی ئەمڕۆ پێنجشەممە فڕۆکە جەنگییەکانی هێزی ئاسمانیی عێراق لە جۆری F16 هێرشێکی بەرفراوانیان کردە سەر مۆڵگەکانی ڕێکخراوی داعش لە دەوروبەری گوندی عەتشانەی سەر بە قەزای دوبز.

 

زانیاریی زیاتر: هاوکات لەگەڵ بۆردوومانەکە هێزێکی هاوبەش لە دژە تیرۆر و لیوای 33ـی سەر بە فیرقەی هەشتی سوپای عێراق دەستیان بە ئۆپەراسیۆنێکی ئەمنی فراوان کرد بۆسەر ناوچەکە و ئۆپەراسیۆنەکەش بەردەوامە.