لە هەولێر گرفتی کەمئاوی بە تەواوی چارەسەر دەکرێت

ئاڤا نیوز

 

کێشەی کەمئاوی چارەسەر دەکرێت و کاریگەرییەکانی لافاویش لەسەر شارەکە نامێنێت، هاوکات ئامادەکارییەکان بۆ پێدامی زەوی بە فەرمانبەران قۆناغی باشی بڕیوە.

 

لێدوانی فەرمی: ئومێد خۆشناو، پارێزگاری هەولێر لە کۆنگرەیەکی ڕۆژنامەوانیدا ڕایگەیاند: بە تەواوبوونی پرۆژەکانی ئاوی فریاگوزاری هەولێر - قوشتەپە، گرفتی کەمئاوی لە هەولێر بۆ ماوەیەکی دوور مەودا چارەسەر دەبێت، هاوکات ڕێگرییەکان بۆ دروستبوونی لافاو هەنگاوی باشیان ناوە. 

 

ئومێد خۆشناو لە درێژەی قسەکانیدا باسی لەوەشکردووە: پڕۆسەی دابەشکردنی زەوی بەسەر فەرمانبەراندا، پەیوەندیی بە بانگەشەی هەڵبژاردنەوە نییە، پرۆسەکە بەهۆی قەیرانەکانی دارایی و چەند گرفتێکەوە دواکەوتبوو، ئێستاش پرۆسەکە بەشێوەیەکی باش بەڕێوەدەچێت.

 

گۆشەیەکی دیکەی دیمەنەکە: پارێزگاری هەولێر ئەوەشی ئاشکرا کرد: لە وەزارەتی شارەوانی و سەرۆکایەتیی شارەوانی هەولێر ئامادەکاریی تەواو کراوە بۆ خێراترکردنی پرۆسەی دابەشکردنی زەوی بەسەر فەرمانبەران، هاوکات دەمانەوێت بەر لە پارێزگاکانی دیکە، زەوی بەسەر فەرمانبەراندا دابەش بکرێت.

 

ئەمەش بزانە: پارێزگاری هەولێر ئەمەشی خستەڕوو، جموجۆڵی بەشێک لە کاندیدەکان و لایەنە سیاسییەکان بۆ هەڵبژاردن دەستیپێکردووە، بەداخەوە ئەمانە هێشتان نەچوونەتە شوێنی یاسادانان، کەچی یاسا پێشێل دەکەن و بەر لە دەستپێکردنی کاتی یاسایی دەستیان بە بانگەشە کردووە.