دۆناڵد ترەمپ لەگەڵ زێلینیسکی کۆدەبێتەوە

ئاڤا نیوز

 

پێشبینی دەکرێت هەفتەی داهاتوو دۆناڵد ترەمپ، بەربژێری کۆمارییەکان بۆ پۆستی سەرۆکایەتیی ئەمریکا،  لەگەڵ ڤلۆدیمێر زێلینسکی، سەرۆکی ئۆکراینا دیدارێک ئەنجام بدات.

 

چیرۆکی سەرەکی: هەفتەی داهاتوو ڤلۆدیمێر زێلینیسکی،سەرۆکی ئۆکراینا سەردانی ئەمریکا دەکات و  لە کۆبوونەوەی ئەنجومەنی ئاسایشی نەتەوە یەکگرتووەکان ئامادە دەبێت و وتارێک لەبارەی شەڕی نێوان ڕووسیا و ئۆکراینا دەدات. 

 

ڕاگەیێنراوی فەرمی: دۆناڵد ترەمپ، بەربژێری کۆمارییەکان بۆ پۆستی سەرۆکایەتیی ئەمریکا ڕایگەیاند "بە ئەگەرێکی زۆرەوە" چاوی بە ڤۆلۆدیمیر زێلینسکی، سەرۆکی ئۆکراینا دەکەوێت کە هەفتەی داهاتوو سەردانی ئەمریکا دەکات.

 

زانیاریی بەدەستهاتوو: لە وەڵامی پرسیارێکی ڕۆژنامەنووساندا، سەبارەت بەوەی ئایا چاوی  بە سەرۆکی ئۆکراینا دەکەوێت،  ترەمپ بە "بەڵێ" وەڵامی ڕۆژنامەنووسانی دایەوە.

 

لە لایەکی دیکەوە: ترەمپ بەردەوام هاوکارییەکانی ئەمریکا بۆ هاوپەیمانەکەی لە ڕۆژهەڵاتی ئەوروپا بە "بەفیڕۆدانی پارە" وەسف دەکات.

 

ئەمەش بزانە: ترەمپ بەردەوام بانگەشەی ئەوە دەکات، ئەگەر ببێتەوە سەرۆکی ئەمریکا لەماوەی 24 کاتژمێردا جەنگی نێوان ڕووسیا و ئۆکراینا ڕادەگرێت.