نزیکەی 300 گەنجی خۆبەخش سەنتەری شاری هەولێر پاک دەکەنەوە

ئاڤا نیوز

 

ئەمڕۆ سەدان گەنجی خۆبەخش بە هەمەهەنگی لەگەڵ بەڕێوەبەرایەتی شارەوانی یەک، سەنتەری شاری هەولێریان پاک کردەوە.

 

وێنە گەورەکە: ئەمڕۆ هەینی 20-9-2024، بەبۆنەی ڕۆژی جیهانی ژینگە لە شاری هەولێر نزیکەی 300 گەنجی خۆبەش لە هەڵمەتێکدا لەژێر دورشمی "هەولێر هەر هەولێرە" بازاری گەورەی سەنتەری شاری هەولێریان پاککردەوە.

لێدوانی فەرمی: ژیار جەلال، بەڕێوەبەری خزمەتگوزاریی ژینگەی هەولێر، بە ئاڤا نیوزی ڕاگەیاند: لە ڕۆژی جیهانی ژینگەدا، بە بەشداری سەدان گەنجی خۆبەخش و بە دورشمی "هەولێر هەر هەولێرە" هەڵمەتێکی پاککردنەوەی ژینگەمان ئەنجامدا و بازاری هەولێرمان شۆرد.

 

زانیاریی زیاتر: لە هەڵمەتەکەدا 11 تانکەری 20 هەزار لیتری ئاو ئامادە کرا بوو، تێچووی هەڵمەتەکە و ئامادەکردنی پێداویستییەکان لەلایەن خێرخوازێکی شاری هەولێر ڕێکخرابوو.

 

ئەوەی پێویستە بیزانیت: ڕۆژانە دوو هەزار 200 تا دوو هەزار 300 تۆن زبڵ و خاشاک لە سەنتەری شاری هەولێر و قەزا و ناحییەکانی کۆدەکرێتەوە و لە زبڵخانەی کانی قرژاڵە ژێرخاک دەکرێت.

 

باکگراوند:  لە ڕۆژی 8-1-2023 كۆمه‌ڵه‌ی گشتیی نه‌ته‌وه‌ یه‌كگرتووه‌كان له‌ دانیشتنی ژماره‌ 78ـی خۆیدا به‌ كۆی ده‌نگ بڕیارنامه‌ی 78/122ی ڕۆژی جیهانی پاككردنه‌وه‌ی ژینگه‌ی په‌سه‌ند كرد، بڕیاریدا ڕۆژى 20ـی ئه‌یلوولی هه‌موو ساڵێك وه‌ك ڕۆژی جیهانی پاككردنه‌وه‌ی ژینگه‌ ده‌ستنیشان بكرێت و ساڵانه‌ یادی بكرێته‌وه.