پەرلەمانتارێکی پارتی: هەڵوێستەکانی حەلبووسی دژی پێشمەرگە بۆ خۆ نزیکردنەوەیە لە شیعە

ئاڤا نیوز

 

په‌رله‌مانتارێكی پارتی له‌ ئه‌نجوومه‌نی نوێنه‌رانی عێراق قسه‌كانی محەممەد حەلبووسی، سه‌رۆكی دوورخراوەی ئه‌نجوومه‌نی نوێنه‌رانی عێراق ڕه‌تده‌كاته‌وه‌ و ئاماژە بەوە دەکات کە پێشمه‌رگه‌ ڕۆڵی گرنگی له ‌ناوچه‌كه دا هەبووە.

 

چیڕۆکی سەرەکی: لەم دواییانە محەمەد حەلبوسی سەرۆکی دوورخراوەی پەرلەمانی عێراق، لە لێدوانێکیدا دژایەتی خۆی بۆ پڕچەککردنی پێشمەرگە بە چەکی پێشکەوتوو دەربڕی، پەڕلەمانتارێکی ئەنجوومەنی نوێنەرانی عێراقیش دەڵێت: ئەم هەڵوێستە هەم نادادپەروەرانە و هەم دووڕووییە.

 

لێدوانی فەرمی: خدر مه‌نتك، ئەندامی ئەنجوومەنی نوێنەرانی عێراق بە ئاڤا نیوزی ڕاگەیاند: "هێزی پێشمەرگە دامەزراوەیەکی سەربازی یاسایی و شەرعییە، لەپێناو پاراستنی هەرێمی کوردستان و قەوارە یاسایی و شەرعییەتەکەی لە هەڕەشەی دەرەکی، دامەزراوە.

 

زانیاریی زیاتر: خدر مەنتک باسی لەوەش کرد: پێشمەرگە لە چوارچێوەی یاسای دەستوری عێراق دا کار دەکات، دانیشتووانی ناوچەکە بە کورد، عەرەب، مەسیحی، ئێزیدی و کەمە نەتەوەییەکانەوە دەپارێزێت.

 
 
لەلایەکی دیکەوە: پەرلەمانتارەکەی پارتی ئاماژەی بەوەکرد، هەڵوێستەکانی حەلبووسی لەبارەی پڕچەککردنی پێشمەرگە هەم نادادپەروەری و هەم دووڕووییە، چونکە پێشمەرگە یەکێک بووە لە کاریگەرترین هێزەکانی عێراق لە شەڕی دژی تیرۆر دا.

 

لە درێژەکانی قسەکانی دا، پەرلەمانتارەکەی پارتی دەڵێت، حەلبووسی بە مەبەست دەیەوێت ڕۆڵی گرنگی پێشمەرگە لە ئاسایشی ناوچەکە و جیهاندا پشتگوێ بخات و لەسەر حسابی پێشمەرگە و ئاسایشی هەرێمی کوردستان، خۆی لە شیعەکان نزیک بکاتەوە، لە کاتێکدایە شیعەکان بوون حەلبووسیان لە پۆستەکەی دوورخستەوە و ئەویش هانای بۆ کوردستان هێنا و خۆی و خێزانەکەی لە سایەی ئارامی ژێر دەسەڵاتی پێشمەرگەدا پارێزران".

 

قووڵتر: خدر مەنتک ئەوەشی خستەڕوو، پێشمەرگە ئەندامێکی سەرەکی هاوپەیمانی نێودەوڵەتییە دژی تیرۆر، هاوکات هێزەکانی پێشمەرگە بەشێکی فراوانی عێراقیان ئازاد کرد و لە دژی تیرۆرستان جەنگان.