دادگەی فیدڕاڵيی دادبینی بۆ یاسای هەڵبژاردنی هەرێمی کوردستان دەکات

ئاڤا نیوز

 

بۆ جاری دەیەم دانیشتنی دادگەی فیدڕاڵيی عێراق تایبەتە بە یاسای هەڵبژاردنی هەرێمی کوردستان. یەکلایی نەبوونەوەی ئەم پرسە، بڕیاردان بۆ دیاریکردنی وادەیەکی نوێی بۆ بەڕێوەچوونی هەڵبژاردنی خولی شەشەمی پەرلەمانی کوردستان دواخستووە.

وێنە گەورەکە: ڕۆژی 11-02-2024، دادگەی باڵای فیدڕاڵيی عێراق، سكاڵایەکی دواخست کە لەلایەن زیاد جەبار، سەرۆکی فراکسیۆنی یەکێتیی نیشتیمانیی لە پەرلەمانی کوردستان و ئامانج نەجیب شەمعوون، ئەندامی خولی پێشووی ئەنجومەنی پارێزگای سلێمانییەوە تۆمار کراوە، تایبەتە بە هەڵوەشانەوەی ماددەکانی (1، 9، 15، 22 و 36) لە یاسای هەڵبژاردنی هەرێمی کوردستان.

بۆچی گرنگە: یەکلایی نەبوونەوەی ئەم پرسە، بڕیاردان بۆ دیاریکردنی وادەیەکی نوێی بۆ بەڕێوەچوونی هەڵبژاردنی خولی شەشەمی پەرلەمانی کوردستان دواخستووە، کە دوایین وادە 25-02-2024 بۆ ئەو پڕۆسەیە دیاریکرا، بەڵام کۆمیسیۆنی باڵای سەربەخۆی هەڵبژاردنەکانی عێراق بە نووسراوی فەرمی ئاماژەی بەوەدا کە ناتوانن لەو ڕێککەوتە سەرپەرشتی هەڵبژاردن بکەن.

زانیاری بەدەستهاتوو: ئاڤا زانیویەتی لە کۆبوونەوەی 13-02-2024  نێچیرڤان بارزانی و سەرۆکایەتیی دادگەی پێداچوونەوەی هەرێمی كوردستان، داوای لە سەرۆکایەتیی دادگەکە کردووە، ئه‌گەر 18ـی ئەم مانگە دادگەی فیدراڵی بابەتی سکاڵاکەی یاسای هەڵبژاردنی پەرلەمانی کوردستان دوابخات، کاری ڕژد بۆ دۆزینەوەی دەرچەیەکی یاسایی بۆ پرسی هه‌ڵبژاردن بکەن.